میئر کراچی کا بارش سے متاثرہ علاقوں کا دورہ، شہریوں کو گھروں میں رہنے کی ہدایت

میئر کراچی بیرسٹر مرتضیٰ وہاب نے بدھ اور جمعرات کی درمیانی شب شہر کے مختلف بارش سے متاثرہ علاقوں کا دورہ کیا۔ تیز ہواؤں اور موسلادھار بارش کے باعث پیش آنے والے مختلف حادثات میں 19 افراد جاں بحق جبکہ متعدد زخمی ہوئے ہیں۔

میئر کراچی نے مائی کولاچی روڈ، بوٹ بیسن، دو تلوار اور آئی آئی چندریگر روڈ سمیت دیگر مقامات کا جائزہ لیا۔ اس موقع پر ان کا کہنا تھا کہ انتظامیہ کی جانب سے بروقت اقدامات کے نتیجے میں شہر کی مجموعی صورتحال معمول پر ہے۔ تیز ہواؤں کے باعث درخت گرنے کے واقعات کی اطلاعات پر محکمہ پارکس کو فوری طور پر راستے صاف کرنے کی ہدایات جاری کر دی گئی ہیں۔

بیرسٹر مرتضیٰ وہاب نے مزید کہا کہ ٹریفک کی روانی کو برقرار رکھنے کے لیے تمام تر وسائل بروئے کار لائے جا رہے ہیں تاکہ شہریوں کو آمدورفت میں مشکلات کا سامنا نہ ہو۔ میونسپل کارپوریشن کے ساتھ ساتھ واٹر کارپوریشن کا عملہ بھی سڑکوں پر موجود ہے اور نکاسی آب کا عمل جاری ہے۔

دورے کے دوران میئر کراچی کے ہمراہ ایم ڈی واٹر کارپوریشن احمد علی صدیقی اور دیگر اعلیٰ حکام بھی موجود تھے۔ میئر کراچی نے شہریوں سے اپیل کی کہ وہ بلاوجہ گھروں سے باہر نکلنے سے گریز کریں اور احتیاطی تدابیر اختیار کریں۔