عسکری قیادت کی جانب سے قوم کو عید کی مبارکباد

راولپنڈی میں مسلح افواج کے سربراہان نے قوم کو عید الفطر کی پرمسرت موقع پر مبارکباد پیش کی ہے۔ چیف آف آرمی اسٹاف جنرل سید عاصم منیر، چیف آف نیول اسٹاف ایڈمرل نوید اشرف اور چیف آف ایئر اسٹاف ایئر چیف مارشل ظہیر احمد بابر سدھو نے مسلح افواج کی جانب سے اپنے پیغام میں کہا ہے کہ یہ تہوار اتحاد، ہمدردی اور شکر گزاری کا درس دیتا ہے۔

عسکری قیادت کا کہنا ہے کہ وردی پوش جوانوں کے لیے عید کا اصل مفہوم وطن کی حفاظت اور خدمت میں مضمر ہے۔ ملک و قوم کے تحفظ کی خاطر اپنے اہل خانہ سے دور رہ کر فرائض سرانجام دینا ہی ان کے لیے عید کی حقیقی خوشی ہے۔

پیغام میں شہداء اور غازیوں کی قربانیوں کو خراج تحسین پیش کرتے ہوئے ان کے خاندانوں کے صبر اور حمایت کو سراہا گیا ہے جس کی بدولت جوان اپنے فرائض کو انتہائی تندہی اور عزم کے ساتھ پورا کر رہے ہیں۔

مسلح افواج نے دعا کی ہے کہ عید الفطر کا یہ مبارک دن پاکستان اور پوری امت مسلمہ کے لیے امن، خوشحالی اور بے شمار برکتوں کا پیش خیمہ ثابت ہو۔