ایلون مسک کو 2022 میں ٹوئٹر کی 44 ارب ڈالر میں خریداری سے قبل سرمایہ کاروں کو گمراہ کرنے کا ذمہ دار قرار دے دیا گیا۔ سان فرانسسکو کی ایک جیوری نے اپنے فیصلے میں کہا کہ مسک نے اپنے ٹویٹس کے ذریعے ٹوئٹر کے حصص کی قیمتوں کو جان بوجھ کر متاثر کیا جس سے سرمایہ کاروں کو نقصان پہنچا۔
تین روز تک جاری رہنے والی مشاورت کے بعد نو رکنی جیوری نے یہ فیصلہ سنایا۔ جیوری نے کہا کہ مسک کے دو ٹویٹس، جن میں ایک یہ بھی شامل تھا کہ ٹوئٹر کے ساتھ سودا عارضی طور پر معطل کیا جا رہا ہے، سرمایہ کاروں کو گمراہ کرنے کا سبب بنے۔ تاہم عدالت نے انہیں فراڈ کے الزامات سے بری قرار دیتے ہوئے کہا کہ انہوں نے سرمایہ کاروں کو دھوکا دینے کے لیے کسی سازش کا سہارا نہیں لیا۔
مقدمے کی سماعت دو مارچ سے جاری تھی جو کہ ایک کلاس ایکشن مقدمہ تھا۔ جیوری نے شیئر ہولڈرز کو فی حصص تین سے آٹھ ڈالر تک ہرجانہ ادا کرنے کی سفارش کی ہے۔ ماہرین کا کہنا ہے کہ اس فیصلے کے نتیجے میں ایلون مسک کو اربوں ڈالر کا جرمانہ ادا کرنا پڑ سکتا ہے، تاہم حتمی رقم کا تعین ابھی باقی ہے۔
مقدمے کے دوران ایلون مسک نے اپنے دفاع میں موقف اختیار کیا کہ ٹوئٹر پر بوٹس اور جعلی اکاؤنٹس کی تعداد کمپنی کی جانب سے بتائی گئی پانچ فیصد کی شرح سے کہیں زیادہ تھی۔ اسی بنیاد پر انہوں نے خریداری کے عمل سے پیچھے ہٹنے کی کوشش کی تھی۔ اس سے قبل ٹوئٹر نے ڈیل کو یقینی بنانے کے لیے ڈیلاویئر کی عدالت سے رجوع کیا تھا، جس کے بعد مسک نے اپنے پرانے معاہدے کے تحت خریداری مکمل کرنے پر رضامندی ظاہر کی تھی۔
اس عدالتی فیصلے پر ردعمل جاننے کے لیے میڈیا نے ایکس انتظامیہ سے رابطہ کیا ہے تاہم تاحال کوئی جواب موصول نہیں ہوا۔ ایلون مسک کی موجودہ دولت کا تخمینہ 814 ارب ڈالر لگایا گیا ہے جس کا بڑا حصہ ٹیسلا کے حصص پر مشتمل ہے۔
صدر ڈونلڈ ٹرمپ کے بیجنگ کے دورے اور چینی صدر شی جن پنگ کے ساتھ…
اسلام آباد میں پاکستان تحریک انصاف کے بانی چیئرمین سے ملاقات کے لیے چھ رکنی…
اقوام متحدہ کے سابق ہتھیاروں کے معائنہ کار اور امریکی میرین کور کے انٹیلی جنس…
وزیراعظم شہباز شریف کی جانب سے گلگت بلتستان کے دورے کے دوران خطے میں چار…
کراچی میں پانی کی چوری کی روک تھام کے لیے قائم خصوصی تھانہ خود سنگین…
امریکی صدر ڈونلڈ ٹرمپ چین کے دورے پر پہنچ گئے ہیں، ان کے ہمراہ امریکہ…