وزیر داخلہ محسن نقوی کا قوم کو عید کی مبارکباد، شہداء کو خراجِ عقیدت پیش

وفاقی وزیر داخلہ محسن نقوی نے قوم کو عید الفطر کی مبارکباد پیش کرتے ہوئے کہا ہے کہ یہ تہوار ماہ رمضان میں حاصل ہونے والی روحانی تربیت، صبر، تقویٰ اور ایثار کی عملی تصویر ہے۔

وزیر داخلہ نے اپنے پیغام میں زور دیا کہ عید صرف خوشیاں منانے کا نام نہیں بلکہ یہ ضرورت مندوں کی مدد کرنے کا بہترین موقع ہے۔ ان کا کہنا تھا کہ معاشرے میں ہم آہنگی اور دوسروں کے چہروں پر مسکراہٹیں بکھیرنے میں ہی حقیقی خوشی پوشیدہ ہے۔

محسن نقوی نے وطن عزیز کے شہدا کو خراج عقیدت پیش کرتے ہوئے کہا کہ قوم ان عظیم ہیروز کو کبھی فراموش نہیں کرے گی جنہوں نے ملک کے پرامن مستقبل کے لیے اپنی جانوں کا نذرانہ پیش کیا۔ انہوں نے شہدا کے لواحقین کے صبر اور حوصلے کو بھی سراہا۔

وزیر داخلہ نے سرحدوں پر تعینات سیکیورٹی فورسز کے جوانوں کو خصوصی خراج تحسین پیش کیا جو اپنے پیاروں سے دور رہ کر ملک کی حفاظت کے فرائض سرانجام دے رہے ہیں۔

محسن نقوی نے اپیل کی کہ موجودہ حالات میں پوری قوم اتحاد اور یکجہتی کا مظاہرہ کرے۔ انہوں نے شہریوں سے کہا کہ وہ عید کی خوشیوں میں دنیا بھر میں مشکلات کا شکار مسلمانوں کو اپنی دعاؤں میں یاد رکھیں۔

آخر میں وزیر داخلہ نے ملک و قوم کی سلامتی، مظلومین کی حفاظت اور امت مسلمہ کے اتحاد کے لیے خصوصی دعا کی۔ انہوں نے اللہ تعالیٰ سے تمام عبادات، روزوں اور دعاؤں کے قبول ہونے کی التجا بھی کی۔