ملک کے مختلف حصوں میں تیز ہواؤں اور گرج چمک کے ساتھ بارش کی پیش گوئی

محکمہ موسمیات نے ملک بھر میں آئندہ چوبیس گھنٹوں کے دوران تیز ہواؤں اور گرج چمک کے ساتھ بارش کی پیش گوئی کی ہے۔ اس دوران چند مقامات پر ژالہ باری کا بھی امکان ظاہر کیا گیا ہے۔

موسمیاتی رپورٹ کے مطابق بلوچستان، خیبر پختونخوا، بالائی و وسطی پنجاب، کشمیر اور اسلام آباد میں آندھی اور گرج چمک کے ساتھ بارش متوقع ہے۔ جنوبی پنجاب اور بالائی سندھ میں بھی کہیں کہیں بارش کا امکان ہے۔

محکمہ موسمیات نے خبردار کیا ہے کہ بلوچستان کے مختلف علاقوں میں موسلادھار بارش اور ژالہ باری ہو سکتی ہے۔ اسی طرح کی صورتحال خیبر پختونخوا کے وسطی و جنوبی اضلاع، خطہ پوٹھوہار اور کشمیر میں بھی پیش آ سکتی ہے۔

حکام نے تنبیہ کی ہے کہ ژالہ باری اور تیز ہواؤں سے پنجاب، خیبر پختونخوا اور سندھ میں کھڑی فصلوں کو نقصان پہنچنے کا خدشہ ہے۔ مزید برآں، شدید بارشوں کے باعث بلوچستان اور خیبر پختونخوا کے نشیبی علاقوں میں فلیش فلڈنگ کا خطرہ بھی موجود ہے۔

اسلام آباد میں مطلع جزوی طور پر ابر آلود رہے گا جبکہ شام اور رات کے اوقات میں گرج چمک کے ساتھ بارش اور کہیں کہیں ژالہ باری متوقع ہے۔

خیبر پختونخوا کے اضلاع پشاور، مردان، صوابی، کوہاٹ، بنوں، ڈیرہ اسماعیل خان، ایبٹ آباد، مانسہرہ، سوات اور دیر میں تیز ہواؤں اور گرج چمک کے ساتھ بارش کا امکان ہے۔

پنجاب کے علاقوں راولپنڈی، مری، اٹک، چکوال، لاہور، فیصل آباد، سرگودھا، ملتان، بہاولپور اور سیالکوٹ میں بھی شام اور رات کے دوران بارش اور ژالہ باری متوقع ہے۔

سندھ کے شہروں سکھر، خیرپور، لاڑکانہ، دادو اور جیکب آباد میں مطلع ابر آلود رہے گا اور چند مقامات پر تیز ہواؤں کے ساتھ بارش ہو سکتی ہے۔

بلوچستان کے دارالحکومت کوئٹہ سمیت خضدار، چمن، ژوب اور گوادر کے مختلف اضلاع میں بھی گرج چمک اور تیز ہواؤں کے ساتھ بارش کا امکان ہے جبکہ بعض مقامات پر ژالہ باری بھی ہو سکتی ہے۔

کشمیر میں شام اور رات کے دوران گرج چمک کے ساتھ بارش اور ژالہ باری متوقع ہے، جبکہ گلگت بلتستان میں موسم خشک اور مطلع جزوی طور پر ابر آلود رہنے کا امکان ہے۔