ٹانک: سی ٹی ڈی کا آپریشن، دو دہشت گرد ہلاک

ضلع ٹانک میں محکمہ انسداد دہشت گردی نے ایک اہم آپریشن کے دوران کالعدم ٹی ٹی پی مشتاق گروپ کے دو انتہائی مطلوب دہشت گردوں کو ہلاک کر دیا ہے۔ حکام کے مطابق یہ کارروائی تھانہ گومل کی حدود شیخ اوتار کے علاقے میں عمل میں لائی گئی۔

سی ٹی ڈی حکام کا کہنا ہے کہ فورسز کو دیکھتے ہی دہشت گردوں نے فائرنگ شروع کر دی جس کے بعد جوابی کارروائی کا سلسلہ تقریباً چالیس منٹ تک جاری رہا۔ فائرنگ تھمنے کے بعد علاقے میں سرچ آپریشن کیا گیا جس کے دوران دو دہشت گردوں امداد اللہ اور توقیر کی لاشیں برآمد کر لی گئیں۔

ہلاک ہونے والے دہشت گردوں کے قبضے سے دو کلاشنکوف، چھ میگزین، بھاری مقدار میں کارتوس اور دو بینڈولیئرز قبضے میں لے لیے گئے ہیں۔

محکمہ انسداد دہشت گردی کے مطابق ہلاک ہونے والے دونوں دہشت گرد سیکیورٹی فورسز پر متعدد حملوں میں ملوث تھے۔ ان میں آئی ای ڈی کے ذریعے پولیس وین پر حملہ جس میں پانچ اہلکار شہید ہوئے، گورنمنٹ گرلز مڈل اسکول روڑی میں پولیس اہلکاروں کو یرغمال بنانا، اور کانوڈی پاٹن میں پولیس موبائل پر آئی ای ڈی حملہ شامل ہے جس میں دو اہلکار شہید ہوئے تھے۔

دہشت گردوں کے خلاف درج ریکارڈ کے مطابق یہ ملزمان ڈیرہ ٹانک روڈ پر پولیس موبائل اور ججز کے قافلے پر حملے، ہیڈ کانسٹیبل عزیز کی ٹارگٹ کلنگ کے علاوہ کانسٹیبل ریحان کے اغوا اور شہادت کے واقعات میں بھی ملوث تھے۔