قاسم خان کی اقوامِ متحدہ میں تقریر: بیرسٹر گوہر کا حکومتی تنقید کو بلاجواز قرار

پاکستان تحریک انصاف کے چیئرمین بیرسٹر گوہر علی خان نے اقوام متحدہ کی انسانی حقوق کونسل میں بانی پی ٹی آئی عمران خان کے صاحبزادے قاسم خان کی تقریر پر حکومتی ردعمل کو بلاجواز قرار دے دیا ہے۔

قاسم خان نے ایک روز قبل اقوام متحدہ کے فورم پر اپنے والد کی فوری رہائی کے لیے عالمی برادری سے مداخلت کی اپیل کی تھی۔ اس بیان کے بعد وفاقی وزیر اطلاعات عطا اللہ تارڑ نے پی ٹی آئی اور عمران خان کے صاحبزادوں پر قومی اور معاشی مفادات کے خلاف کام کرنے کا الزام عائد کیا تھا اور دعویٰ کیا تھا کہ اس تقریر سے ملک کی ساکھ اور استحکام کو نقصان پہنچانے کی کوشش کی گئی ہے۔

بیرسٹر گوہر نے عطا اللہ تارڑ کے الزامات کو مسترد کرتے ہوئے کہا کہ عمران خان کے بیٹوں کی اپنے والد کے لیے کوششیں غیر سیاسی ہیں اور انہیں متنازع نہیں بنانا چاہیے۔ انہوں نے وزیر اطلاعات کے لب و لہجے کی مذمت کرتے ہوئے کہا کہ پی ٹی آئی اور بانی چیئرمین کا خاندان پہلے ہی واضح کر چکا ہے کہ رہائی کے لیے تمام کوششیں آئین اور قانون کے دائرہ کار میں رہ کر کی جائیں گی۔

چیئرمین پی ٹی آئی نے کہا کہ عمران خان تین سال سے قید میں ہیں اور انہیں طبی سہولیات اور اہل خانہ سے ملاقات تک محدود رسائی حاصل ہے۔ ایسی صورتحال میں بچوں کا اپنے والد کی رہائی کے لیے آواز اٹھانا فطری عمل ہے اور اس میں کچھ بھی غلط نہیں ہے۔ انہوں نے کہا کہ اقوام متحدہ کے انسانی حقوق کے ادارے پہلے ہی عمران خان کی حراست کے حالات پر تشویش کا اظہار کر چکے ہیں۔

بیرسٹر گوہر نے وضاحت کی کہ قاسم خان کی تقریر براہ راست نشر ہوئی تھی جس میں پاکستان کے جی ایس پی پلس اسٹیٹس کے خلاف ایک لفظ بھی نہیں بولا گیا۔ انہوں نے وفاقی وزیر کو تنقید کا نشانہ بناتے ہوئے مطالبہ کیا کہ وہ پاناما پیپرز کیس کی تحقیقات کرنے والی جے آئی ٹی کی والیم ٹین اور مری میں ہونے والی خفیہ ملاقاتوں کی تفصیلات قوم کے سامنے لائیں۔

انہوں نے الزام عائد کیا کہ ماضی میں حکومتی عہدیداروں کے بیانات کو بین الاقوامی عدالتوں میں پاکستان کے خلاف استعمال کیا گیا جن پر حکومت نے کبھی وضاحت نہیں دی۔ انہوں نے مزید کہا کہ موجودہ کشیدہ علاقائی صورتحال میں پی ٹی آئی اختلافات کو پس پشت ڈال کر ملک کے مفاد میں سوچ رہی ہے، جبکہ حکومتی وزراء کے بیانات ملکی مفادات کے منافی ہیں۔