پاکستان آج رات ارتھ آور منائے گا، غیر ضروری برقی آلات بند رکھے جائیں گے

پاکستان سمیت دنیا بھر میں آج ہفتے کی شب ارتھ آور منایا جائے گا جس کا مقصد ماحولیاتی تحفظ اور توانائی کی بچت کے حوالے سے شعور اجاگر کرنا ہے۔ اس سال ارتھ آور کا مرکزی موضوع گیو این آور فار ارتھ رکھا گیا ہے۔

ملک بھر میں ارتھ آور کے موقع پر رات ساڑھے آٹھ بجے سے ساڑھے نو بجے تک غیر ضروری لائٹس بند رکھی جائیں گی۔ یہ اقدام موسمیاتی تبدیلیوں کے تدارک، قدرتی وسائل کے تحفظ اور توانائی کی بچت کے لیے اجتماعی ذمہ داری کے احساس کو بیدار کرنے کے لیے کیا جا رہا ہے۔

عالمی سطح پر یہ مہم ورلڈ وائڈ فنڈ فار نیچر کی جانب سے دو ہزار سات میں شروع کی گئی تھی جو اب دنیا کے ایک سو نوے سے زائد ممالک میں ایک بڑی عوامی تحریک کی شکل اختیار کر چکی ہے۔ رواں برس اس مہم کی بیسویں سالگرہ منائی جا رہی ہے جس کا مقصد شہریوں اور سرکاری و نجی اداروں کو ماحول دوست اقدامات کے لیے متحرک کرنا ہے۔

ارتھ آور کے دوران دنیا بھر میں اہم تاریخی مقامات، سرکاری عمارتوں اور رہائشی گھروں کی بتیاں ایک گھنٹے کے لیے گل کر دی جاتی ہیں۔ اس مہم کے تحت عوام سے اپیل کی گئی ہے کہ وہ نہ صرف بجلی کی بچت کریں بلکہ فضلے میں کمی اور حیاتیاتی تنوع کے تحفظ جیسے عملی اقدامات میں بھی حصہ لیں۔