پنجاب میں زیرو ویسٹ مہم: مریم نواز کی شہریوں سے پلاسٹک کا استعمال ترک کرنے کی اپیل

وزیر اعلیٰ پنجاب مریم نواز نے شہریوں پر زور دیا ہے کہ وہ پلاسٹک کا استعمال ترک کر دیں اور ماحول کو آلودگی سے پاک رکھنے کے لیے اجتماعی کوششوں کو یقینی بنائیں۔

عالمی یومِ زیرو ویسٹ کے موقع پر اپنے پیغام میں وزیر اعلیٰ پنجاب کا کہنا تھا کہ فضلہ جات میں کمی، ری سائیکلنگ کے فروغ اور پائیدار طرز زندگی کو اپنانا ایک صاف ستھرے مستقبل کے لیے ناگزیر ہے۔

انہوں نے واضح کیا کہ ستھرا پنجاب پروگرام کے تحت صوبے کے تمام شہروں کو زیرو ویسٹ زون میں تبدیل کیا جا رہا ہے، جس کے تحت کوڑے کے ڈھیروں کو سرسبز جنگلات اور سولر پارکس میں تبدیل کرنے کے منصوبوں پر کام جاری ہے۔

مریم نواز نے ماحولیاتی پائیداری کے لیے اٹھائے گئے اقدامات کا ذکر کرتے ہوئے بتایا کہ صوبے میں پلاسٹک بیگز پر پابندی عائد کر دی گئی ہے، جبکہ کسانوں کے لیے سپر سیڈر متعارف کروانے کے علاوہ برقی گاڑیوں اور ویسٹ ٹو ویلیو منصوبوں پر تیزی سے عمل درآمد کیا جا رہا ہے۔

وزیر اعلیٰ نے اس عزم کا اعادہ کیا کہ کرہ ارض کو آلودگی سے بچانا ہم سب کی مشترکہ ذمہ داری ہے، لہذا شہریوں کو چاہیے کہ وہ ماحولیاتی تنزلی کو روکنے کے لیے اپنا فعال کردار ادا کریں۔