پنجاب میں آبی پرندوں کے شکار پر پابندی عائد، خلاف ورزی پر سخت کارروائی کا انتباہ

پنجاب بھر میں آبی پرندوں کے شکار پر باضابطہ پابندی عائد کر دی گئی ہے۔ محکمہ وائلڈ لائف نے شکار کا سیزن ختم ہونے کا باضابطہ اعلان کرتے ہوئے صوبے بھر میں کارروائیوں کا سلسلہ روک دیا ہے۔

محکمہ وائلڈ لائف کے ترجمان کے مطابق یہ پابندی پرندوں کے افزائش نسل کے موسم کے پیش نظر لگائی گئی ہے۔ حکام کا کہنا ہے کہ پرندوں کی افزائش کے عمل کو محفوظ بنانے کے لیے شکار پر مکمل قدغن لگا دی گئی ہے۔

یاد رہے کہ رواں سیزن کے لیے شکار کی اجازت یکم اکتوبر 2025 سے 31 مارچ 2026 تک دی گئی تھی جس کے دوران صرف ہفتہ اور اتوار کے روز شکار کرنے کی اجازت تھی۔

محکمہ وائلڈ لائف نے واضح کیا ہے کہ سیزن کے اختتام کے بعد کسی بھی مقام پر آبی پرندوں کا شکار کرنے والوں کے خلاف سخت قانونی کارروائی عمل میں لائی جائے گی۔ صوبے بھر میں حکام کو ہدایات جاری کر دی گئی ہیں کہ پابندی کی خلاف ورزی کرنے والوں کے ساتھ کسی قسم کی رعایت نہ برتی جائے۔