بھارت کی پاکستانی قیدیوں کو استعمال کر کے فالس فلیگ آپریشن کی منصوبہ بندی، ذرائع

اسلام آباد (نمائندہ خصوصی) مودی سرکار مشرق وسطیٰ کی جنگ میں پاکستان کے فعال ثالثی کردار سے بوکھلاہٹ کا شکار ہے اور سفارتی تنہائی مٹانے کے لیے ایک بار پھر جھوٹے آپریشن کی تیاری کر رہی ہے۔ باخبر ذرائع کے مطابق بھارتی سکیورٹی فورسز اپنی گھناؤنی سازشوں کو عملی جامہ پہنانے کے لیے بھارتی قید میں موجود سینکڑوں پاکستانیوں اور کشمیریوں کو جبری طور پر استعمال کرنے کا منصوبہ بنا رہی ہیں۔

ذرائع کا کہنا ہے کہ بھارتی حکام مختلف جیلوں سے ان بے گناہ افراد کو اکٹھا کر رہے ہیں۔ اس ڈرامے کو حقیقت کا روپ دینے کے لیے چند بھارتی قیدیوں کو بھی اس سازش کا حصہ بنایا جا رہا ہے۔ خدشہ ظاہر کیا گیا ہے کہ ان قیدیوں کو کسی جھوٹے فلیگ آپریشن میں استعمال کر کے بھارتی میڈیا اور وزیر خارجہ ایس جے شنکر پاکستان کو بدنام کرنے کی مہم چلائیں گے۔

یہ اقدام بھارت کی سفارتی ناکامی کو چھپانے اور عالمی توجہ پاکستان سے ہٹانے کی ایک پرانی کوشش قرار دی جا رہی ہے۔ اس مذموم منصوبے کے تانے بانے بھارتی خفیہ ایجنسی را اور وزیر خارجہ جے شنکر کے گرد بن رہے ہیں، جنہیں حال ہی میں بھارتی اپوزیشن کی جانب سے سخت تنقید کا سامنا کرنا پڑا تھا۔ اپوزیشن نے سوال اٹھایا تھا کہ بھارت مشرق وسطیٰ کی جنگ ختم کروانے میں پاکستان کی طرح فعال کردار ادا کرنے میں کیوں ناکام رہا۔

تجزیہ کاروں کا کہنا ہے کہ عالمی برادری بھارت کے فرسودہ بیانیے اور مکاریوں سے بیزار ہو چکی ہے۔ پلواامہ اور پہلگام کے واقعات کے طویل عرصہ گزرنے کے باوجود بھارت آج تک اپنے الزامات کے حق میں کوئی ٹھوس ثبوت پیش نہیں کر سکا۔ ماہرین کے مطابق بھارت کی جانب سے بے گناہ پاکستانی قیدیوں کو میڈیا کے سامنے لا کر کی جانے والی کوئی بھی نئی کوشش بری طرح ناکام ہوگی کیونکہ اب عالمی سطح پر بھارت کے پروپیگنڈے کی کوئی ساکھ باقی نہیں رہی۔