ایران سے پاکستانیوں کی وطن واپسی کا عمل جاری، تفتان اور گبد بارڈر پر نقل و حرکت برقرار

کوئٹہ میں حکام کے مطابق ایران اور اسرائیل کے مابین حالیہ کشیدگی کے تناظر میں پاکستانی شہریوں کی وطن واپسی کا عمل مسلسل 33 ویں روز بھی جاری ہے۔ اس عرصے کے دوران اب تک 6 ہزار 8 سو سے زائد پاکستانی شہری تفتان اور گبد ریمدان بارڈر کے راستے وطن واپس پہنچ چکے ہیں۔

سرکاری ذرائع کا کہنا ہے کہ آج گبد ریمدان بارڈر کے ذریعے مزید 40 پاکستانی شہری وطن پہنچے ہیں جس کے بعد اس راستے سے واپس آنے والوں کی مجموعی تعداد 2 ہزار 7 سو 55 ہو گئی ہے۔

اسی طرح تفتان بارڈر کے ذریعے گزشتہ 33 دنوں میں 4 ہزار 77 افراد پاکستان میں داخل ہوئے ہیں۔ 28 فروری سے اب تک دونوں سرحدی گزرگاہوں کے ذریعے وطن واپس آنے والے پاکستانیوں کی کل تعداد 6 ہزار 8 سو 32 تک پہنچ چکی ہے۔

حکام کے مطابق وطن واپس لوٹنے والوں میں ملاح، زائرین، مزدور، طلبا، تاجر اور ایران میں مقیم دیگر پاکستانی شہری شامل ہیں۔