محکمہ موسمیات نے ملک بھر میں آئندہ چوبیس گھنٹوں کے دوران تیز ہواؤں اور گرج چمک کے ساتھ وسیع پیمانے پر بارش کی پیش گوئی کی ہے۔ اس دوران بعض مقامات پر موسلا دھار بارش اور ژالہ باری کا بھی امکان ظاہر کیا گیا ہے۔
تازہ ترین ایڈوائزری کے مطابق بلوچستان، سندھ اور خیبر پختونخوا کے بیشتر علاقوں میں موسلادھار بارش متوقع ہے۔ پنجاب، گلگت بلتستان اور کشمیر کے مختلف حصوں میں شام اور رات کے اوقات میں گرج چمک کے ساتھ بارش اور ژالہ باری کا امکان ہے۔
موسمیاتی دفتر نے خبردار کیا ہے کہ شدید بارشوں کے باعث بلوچستان کے شمال مشرقی اضلاع بشمول ژوب، موسیٰ خیل اور ڈیرہ بگٹی میں فلیش فلڈنگ کا خدشہ ہے۔ اسی طرح ڈیرہ غازی خان کے پہاڑی ندی نالوں اور خیبر پختونخوا کے جنوبی اضلاع میں بھی سیلابی صورتحال پیدا ہو سکتی ہے۔
حکام نے تنبیہ کی ہے کہ تیز ہواؤں، ژالہ باری اور آسمانی بجلی گرنے سے بجلی کے کھمبوں، بل بورڈز اور سولر پینلز جیسے کمزور ڈھانچوں کو نقصان پہنچ سکتا ہے۔ پنجاب، سندھ اور خیبر پختونخوا میں کھڑی فصلوں کے بھی متاثر ہونے کا خدشہ ہے۔
وفاقی دارالحکومت اسلام آباد میں موسم جزوی طور پر ابر آلود رہے گا، جہاں شام یا رات کے اوقات میں بارش اور گرج چمک کے امکانات تیس فیصد ہیں۔
خیبر پختونخوا کے جنوبی اضلاع میں وسیع پیمانے پر بارش اور ژالہ باری متوقع ہے جبکہ بالائی علاقوں میں پہاڑوں پر برفباری کا امکان ہے۔ پنجاب کے جنوبی اضلاع بشمول ڈیرہ غازی خان اور ملتان میں بارش ہوگی، جبکہ لاہور اور راولپنڈی سمیت دیگر حصوں میں تیز ہواؤں کے ساتھ گرج چمک متوقع ہے۔
کراچی اور حیدرآباد سمیت سندھ کے بڑے شہروں میں وقفے وقفے سے بارش اور گرج چمک کا سلسلہ جاری رہے گا، جبکہ جنوبی اضلاع میں شدید بارش اور ژالہ باری کا خدشہ ہے۔
بلوچستان کے بیشتر اضلاع میں وقفے وقفے سے موسلادھار بارش متوقع ہے، خاص طور پر صوبے کے شمال مشرقی حصے شدید بارشوں کی زد میں رہیں گے۔ گلگت بلتستان اور کشمیر میں مطلع ابر آلود رہے گا اور شام یا رات کے اوقات میں پہاڑی علاقوں میں برفباری کے ساتھ بارش کا امکان ہے۔
صدر ڈونلڈ ٹرمپ کے بیجنگ کے دورے اور چینی صدر شی جن پنگ کے ساتھ…
اسلام آباد میں پاکستان تحریک انصاف کے بانی چیئرمین سے ملاقات کے لیے چھ رکنی…
اقوام متحدہ کے سابق ہتھیاروں کے معائنہ کار اور امریکی میرین کور کے انٹیلی جنس…
وزیراعظم شہباز شریف کی جانب سے گلگت بلتستان کے دورے کے دوران خطے میں چار…
کراچی میں پانی کی چوری کی روک تھام کے لیے قائم خصوصی تھانہ خود سنگین…
امریکی صدر ڈونلڈ ٹرمپ چین کے دورے پر پہنچ گئے ہیں، ان کے ہمراہ امریکہ…