ساگیاں انڈسٹریل زون کو صنعتی حیثیت دینے کا مطالبہ، صوبائی وزیر کی یقین دہانی

صوبائی وزیر صنعت و تجارت چوہدری شافع حسین نے صنعت کاروں کو یقین دہانی کرائی ہے کہ ان کے جائز مسائل کو ترجیحی بنیادوں پر حل کیا جائے گا۔ خاص طور پر سگیان انڈسٹریل ایریا میں راوی اربن ڈویلپمنٹ اتھارٹی کی جانب سے عائد کردہ کنورژن فیس کے خاتمے کے مطالبے پر مثبت پیش رفت کی جائے گی۔

یہ یقین دہانی جمعہ کے روز لاہور چیمبر آف کامرس اینڈ انڈسٹری کے سینئر نائب صدر تنویر احمد شیخ کی قیادت میں ملنے والے وفد سے ملاقات کے دوران کرائی گئی۔

صنعت کاروں کے وفد نے وزیر کو آگاہ کیا کہ سگیان کے صنعتی یونٹس ان چارجز کے بوجھ تلے دب چکے ہیں۔ ان کا کہنا تھا کہ پہلے سے قائم شدہ صنعتی یونٹس پر بھاری کنورژن فیس کا نفاذ غیر منصفانہ ہے کیونکہ اس علاقے کا بنیادی ڈھانچہ صنعت کاروں نے خود اپنے وسائل سے تیار کیا ہے۔

صوبائی وزیر نے متعلقہ حکام کو ہدایت کی کہ لاہور چیمبر کے ساتھ مل کر باہمی مشاورت سے اس مسئلے کا قابل عمل حل تلاش کیا جائے۔ انہوں نے اس بات کا اعادہ کیا کہ سگیان میں موجود صنعتی یونٹس پر کمرشلائزیشن یا کنورژن چارجز کا اطلاق مناسب نہیں ہے۔

چوہدری شافع حسین نے کہا کہ کنورژن فیس کا معاملہ اسٹیک ہولڈرز کے ساتھ مشاورت کے ذریعے حل کیا جائے گا۔

اس موقع پر لاہور چیمبر کے سینئر نائب صدر تنویر احمد شیخ نے بتایا کہ سگیان کے علاقے میں تقریباً 1500 صنعتی یونٹس فعال ہیں۔ انہوں نے حکومت سے مطالبہ کیا کہ اس علاقے کو باقاعدہ صنعتی زون کا درجہ دیا جائے اور اس کی پائیدار ترقی کے لیے پالیسی سپورٹ فراہم کی جائے۔