پشاور: پیٹرولیم مصنوعات کی قیمتوں میں اضافے کے بعد مرغی کے گوشت کے نرخوں میں ہوشربا اضافہ

پشاور میں پیٹرولیم مصنوعات کی قیمتوں میں حالیہ اضافے کے اثرات عوام کی جیب پر بوجھ بن گئے ہیں جس کے نتیجے میں مرغی کے گوشت کی قیمتوں میں ہوشربا اضافہ ریکارڈ کیا گیا ہے۔ شہر بھر میں ایک ہی دن کے دوران زندہ مرغی کی قیمت میں 35 روپے فی کلو اضافہ ہوا ہے۔

نئی قیمتوں کے اطلاق کے بعد زندہ مرغی 490 روپے فی کلو میں فروخت کی جا رہی ہے جبکہ اس سے قبل اس کی قیمت 455 روپے فی کلو مقرر تھی۔

دوسری جانب مرغی کے صاف گوشت کی قیمت بھی بلند ترین سطح پر پہنچ گئی ہے اور اب یہ 780 روپے فی کلو کے حساب سے فروخت ہو رہا ہے۔

مارکیٹ تجزیہ کاروں کا کہنا ہے کہ قیمتوں میں اس تیزی کا براہ راست تعلق ایندھن کی بڑھتی ہوئی قیمتوں سے ہے۔ پیٹرول مہنگا ہونے کے باعث ٹرانسپورٹ اور سپلائی چین کے اخراجات بڑھ گئے ہیں جس کا سارا بوجھ بالآخر عام صارفین پر پڑ رہا ہے۔