ایران، اسرائیل اور امریکا کی جنگ کا بوجھ پاکستانی عوام اٹھا رہے ہیں: بلاول بھٹو

پاکستان پیپلز پارٹی کے چیئرمین بلاول بھٹو زرداری نے کہا ہے کہ اسرائیل، امریکہ اور ایران کے مابین جاری کشیدگی کا بوجھ پاکستان کی معیشت پر پڑ رہا ہے اور اس جنگ کا خمیازہ ہر پاکستانی بھگت رہا ہے۔

سابق وزیراعظم اور پیپلز پارٹی کے بانی ذوالفقار علی بھٹو کی 47 ویں برسی کے موقع پر منعقدہ تقریب سے خطاب کرتے ہوئے انہوں نے ایران کے خلاف جاری جنگ کو غیر قانونی قرار دیا اور تعلیمی ادارے پر حملے میں طالبات کی ہلاکت کی شدید مذمت کی۔

بلاول بھٹو زرداری نے خبردار کیا کہ نفرت اور تقسیم پر یقین رکھنے والی قوتوں کے باعث یہ جنگ عالمی سطح پر پھیلنے کا خدشہ ہے کیونکہ اس کے اثرات اب ایران تک محدود نہیں رہے۔ انہوں نے زور دیا کہ جنگ کسی مسئلے کا حل نہیں ہے اور امید ظاہر کی کہ دشمنی کا یہ سلسلہ جلد ختم ہوگا۔ انہوں نے واضح کیا کہ جو قوتیں ایران، فلسطین اور لبنان کو نشانہ بنا رہی ہیں وہ پاکستان کی طرف میلی آنکھ سے نہیں دیکھ سکتیں۔

معاشی ریلیف کے حوالے سے گفتگو کرتے ہوئے انہوں نے وفاقی حکومت پر زور دیا کہ بحران کے دوران شہریوں کی مدد کے لیے بے نظیر انکم سپورٹ پروگرام کا دائرہ کار وسیع کیا جائے اور اگر اس کے لیے منی بجٹ کی ضرورت پڑی تو ان کی جماعت اس کی بھرپور حمایت کرے گی۔

انہوں نے اعلان کیا کہ سندھ حکومت چھوٹے کسانوں کے لیے کسان کارڈ اسکیم شروع کر رہی ہے جبکہ تاریخی مہنگائی کے پیش نظر صوبائی حکومتیں عوام، خاص طور پر کسانوں اور موٹر سائیکل سواروں کو ریلیف دینے کے لیے اقدامات کر رہی ہیں۔ انہوں نے شہریوں سے اپیل کی کہ وہ اپنی موٹر سائیکلیں اپنے نام اور شناختی کارڈ پر رجسٹر کروائیں جس کے لیے ٹرانسفر فیس ختم کر دی گئی ہے۔

چیئرمین پیپلز پارٹی نے کہا کہ حکومت پبلک اور پرائیویٹ ٹرانسپورٹ کو مالی معاونت فراہم کرے گی تاکہ کرایوں میں اضافے کو روکا جا سکے اور ڈیزل کی قیمتوں میں اضافے سے متاثرہ ٹرانسپورٹرز کو ریلیف دینے کے لیے وفاقی حکومت کے ساتھ مل کر کام کیا جائے گا۔ تمام صوبے ٹرانسپورٹرز کی مدد اور کرایوں میں استحکام کے لیے وفاقی فنڈ میں وسائل فراہم کریں گے۔

بلاول بھٹو زرداری نے خیبر پختونخوا کے وزیراعلیٰ اور پاکستان تحریک انصاف کے ارکان کا تعاون پر شکریہ ادا کیا اور قومی مفاد کو سیاست پر فوقیت دینے پر زور دیا۔ انہوں نے کہا کہ پنجاب، بلوچستان اور سندھ سمیت تمام صوبائی قیادت عوام کو ریلیف دینے کے لیے کوشاں ہے۔ انہوں نے اس عزم کا اظہار کیا کہ اگر پاکستان میں اتحاد رہا تو کوئی طاقت ہمیں شکست نہیں دے سکتی اور ہماری نسل اس امتحان سے سرخرو ہو کر نکلے گی۔