اسحاق ڈار اور سعودی وزیر خارجہ کا علاقائی صورتحال پر تبادلہ خیال، کشیدگی کم کرنے پر اتفاق

نائب وزیراعظم اور وزیر خارجہ سینیٹر اسحاق ڈار نے خطے کی تازہ ترین صورتحال پر سعودی عرب کے وزیر خارجہ شہزادہ فیصل بن فرحان السعود سے ٹیلی فونک رابطہ کیا ہے۔ گفتگو کے دوران دونوں رہنماؤں نے خطے میں امن و استحکام کے قیام اور کشیدگی میں کمی لانے کی فوری ضرورت پر زور دیا اور باہمی رابطے برقرار رکھنے پر اتفاق کیا۔

اس سے قبل نائب وزیراعظم اسحاق ڈار نے ایران کے وزیر خارجہ عباس عراقچی سے بھی ٹیلی فون پر گفتگو کی جس میں علاقائی صورتحال پر تبادلہ خیال کیا گیا۔ اس موقع پر اسحاق ڈار نے کشیدگی کم کرنے کی تمام تر کوششوں کی حمایت کا اعادہ کیا۔

وزیر خارجہ نے اس بات پر زور دیا کہ مسائل کا حل صرف مذاکرات اور سفارت کاری کے ذریعے ہی ممکن ہے۔ دونوں ممالک کے وزرائے خارجہ نے خطے میں جاری پیش رفت کے پیش نظر مستقبل میں بھی قریبی رابطے برقرار رکھنے کا فیصلہ کیا ہے۔