کراچی میں گیس کی لوڈشیڈنگ کا نیا شیڈول جاری، مختلف علاقے متاثر

کراچی میں گیس کی فراہمی کا نیا شیڈول جاری کر دیا گیا ہے جس کے تحت شہر کے مختلف علاقوں میں گیس کی بندش کا سلسلہ شروع ہو گیا ہے۔ سوئی سدرن گیس کمپنی کے مطابق گیس کی لوڈ شیڈنگ کے باعث صارفین کو شدید مشکلات کا سامنا ہے۔

نئے شیڈول کے تحت صبح دس بجے سے دوپہر بارہ بجے تک اور سہ پہر تین بجے سے شام چھ بجے تک گیس کی فراہمی معطل رہے گی۔ اسی طرح رات کے اوقات میں گیس کی بندش کا دورانیہ رات دس بجے سے صبح ساڑھے پانچ بجے تک مقرر کیا گیا ہے۔

گیس کی بندش سے متاثرہ علاقوں میں ایف بی ایریا، نارتھ ناظم آباد، ملیر اور کھوکھرا پار شامل ہیں۔ اس کے علاوہ لانڈھی، اورنگی ٹاؤن اور نارتھ کراچی میں بھی گیس کی قلت برقرار ہے۔

گلشن اقبال، ناظم آباد، گارڈن اور لیاقت آباد کے رہائشی بھی طویل لوڈ شیڈنگ سے متاثر ہو رہے ہیں۔ شہریوں کا کہنا ہے کہ صبح کے اوقات میں گیس کی عدم دستیابی کے باعث انہیں گھریلو امور اور ناشتے کی تیاری میں شدید پریشانی کا سامنا ہے۔