بحرانِ توانائی: سندھ کے سوا ملک بھر میں مارکیٹیں اور شاپنگ مالز رات 8 بجے بند کرنے کا فیصلہ

وفاقی حکومت نے توانائی کی بچت اور کفایت شعاری کے اقدامات کے تحت پنجاب، خیبر پختونخوا، بلوچستان، اسلام آباد، گلگت بلتستان اور آزاد کشمیر میں مارکیٹوں اور شاپنگ مالز کو رات آٹھ بجے بند کرنے کا فیصلہ کیا ہے۔ یہ فیصلہ وزیراعظم شہباز شریف کی زیر صدارت توانائی بچت اور پیٹرولیم مصنوعات کے حوالے سے منعقدہ ایک اہم اجلاس میں کیا گیا۔

وزیراعظم آفس سے جاری اعلامیے کے مطابق خیبر پختونخوا کی صوبائی حکومت سے مشاورت کے بعد ڈویژنل ہیڈکوارٹرز میں مارکیٹیں رات نو بجے تک کھلی رکھنے کی اجازت ہوگی۔ نئی پالیسی کے تحت جنرل اسٹورز اور تمام اقسام کے مالز رات آٹھ بجے بند کر دیے جائیں گے، تاہم بیکریز، ریسٹورنٹس، تندور اور کھانے پینے کے مراکز رات دس بجے تک کھلے رہ سکیں گے۔

حکومت نے شادی ہالز، مارکیز اور کمرشل مقامات پر تقریبات رات دس بجے تک محدود کرنے کا فیصلہ کیا ہے۔ نجی رہائش گاہوں پر بھی دس بجے کے بعد تقریبات منعقد کرنے پر پابندی عائد ہوگی، جبکہ میڈیکل اسٹورز اور فارمیسیوں کو ان پابندیوں سے استثنیٰ حاصل ہوگا۔ یہ تمام اقدامات سات اپریل سے نافذ العمل ہوں گے۔

سندھ حکومت کے حوالے سے اعلامیے میں کہا گیا ہے کہ صوبائی انتظامیہ مارکیٹوں کے اوقات کار پر ابھی مشاورت کر رہی ہے۔ وزیراعظم نے توقع ظاہر کی ہے کہ سندھ حکومت جلد ہی قومی مہم کا حصہ بنے گی۔ اس کے علاوہ وزیراعظم نے گلگت اور مظفرآباد میں ایک ماہ تک پبلک ٹرانسپورٹ مفت فراہم کرنے کا اعلان کیا ہے جس کے اخراجات وفاقی حکومت برداشت کرے گی۔

اجلاس میں پیٹرولیم مصنوعات پر سبسڈی ڈیجیٹل والٹس کے ذریعے منتقل کرنے کے پروگرام کا بھی جائزہ لیا گیا، جس کے تحت اب تک ایک لاکھ ٹرانزیکشنز مکمل کی جا چکی ہیں۔ وزیراعظم شہباز شریف نے متعلقہ صوبائی وزرائے اعلیٰ کا ان قومی امور پر تعاون کرنے پر شکریہ ادا کیا۔

مشرق وسطیٰ میں کشیدگی کے بعد پیدا ہونے والی صورتحال اور ایندھن کے بحران کے پیش نظر حکومت نے کفایت شعاری کے متعدد اقدامات متعارف کرائے ہیں۔ ان اقدامات میں ہفتہ وار چھٹی میں اضافہ، وزراء کے لیے مفت پیٹرول کوٹے میں کٹوتی، پروٹوکول گاڑیوں کی تعداد کو محدود کرنا اور طلباء کے لیے سبسڈی والا ایندھن فراہم کرنا شامل ہے۔ اس سے قبل وزیراعظم چار روزہ ورک ویک اور ورک فرام ہوم پالیسی کا اعلان بھی کر چکے ہیں۔