بانی پی ٹی آئی سے ملاقات: وکلاء کی فہرست اڈیالہ جیل انتظامیہ کے حوالے

اسلام آباد میں پاکستان تحریک انصاف کے بانی چیئرمین سے ملاقات کے لیے قانونی ٹیم کی فہرست اڈیالہ جیل انتظامیہ کے حوالے کر دی گئی ہے۔ اس فہرست میں بیرسٹر گوہر خان، سلمان اکرم راجہ، علی زمان، فتح اللہ برکی، ملک احسن قادر اور ماریہ خان بلوچ شامل ہیں۔

تحریک انصاف کے رہنما چوہدری اویس یونس نے یہ فہرست اڈیالہ جیل کے گیٹ نمبر تین پر حکام کے حوالے کی۔ یہ فہرست سلمان اکرم راجہ کی جانب سے جاری کی گئی تھی۔

واضح رہے کہ منگل کا دن اڈیالہ جیل میں بانی پی ٹی آئی اور بشریٰ بی بی سے وکلاء اور اہل خانہ کی ملاقات کے لیے مختص ہے۔ آج مذکورہ وکلاء کی ٹیم بانی پی ٹی آئی سے قانونی امور پر مشاورت کے لیے جیل کا دورہ کرے گی۔