لکی مروت: پولیس وین کے قریب دھماکے سے اے ایس آئی سمیت 5 اہلکار زخمی

لکی مروت کے علاقے شہباز خیل اڈا کے قریب پولیس وین کے نزدیک ہونے والے موٹر سائیکل بم دھماکے میں اسسٹنٹ سب انسپکٹر سمیت پانچ اہلکار زخمی ہو گئے۔

پولیس حکام کے مطابق دھماکہ خیز مواد ایک موٹر سائیکل میں نصب کیا گیا تھا جو پولیس کی گاڑی کے قریب کھڑی کی گئی تھی۔ دھماکے کے بعد علاقے میں شدید خوف و ہراس پھیل گیا۔

واقعے کی اطلاع ملتے ہی پولیس کی بھاری نفری جائے وقوعہ پر پہنچ گئی۔ سیکیورٹی فورسز نے علاقے کو گھیرے میں لے کر شواہد اکٹھے کرنا شروع کر دیے ہیں۔

زخمی ہونے والوں میں اے ایس آئی جمال الدین، کانسٹیبل عارف اور ڈرائیور میر حسن شامل ہیں۔ تمام زخمیوں کو فوری طور پر قریبی ہسپتال منتقل کر دیا گیا ہے جہاں انہیں طبی امداد فراہم کی جا رہی ہے۔

پولیس حکام کا کہنا ہے کہ واقعے کی تحقیقات کا عمل شروع کر دیا گیا ہے اور دھماکے میں ملوث عناصر کی گرفتاری کے لیے چھاپے مارے جا رہے ہیں۔