اداکارہ دیدار کا ریشم سے معافی مانگنے سے انکار، تنازع شدت اختیار کر گیا

پاکستانی شوبز انڈسٹری کی دو معروف اداکاراؤں دیدار اور ریشم کے درمیان جاری تنازع شدت اختیار کر گیا ہے اور صوبائی وزیر اطلاعات عظمیٰ بخاری کی مداخلت کے باوجود دیدار نے معافی مانگنے سے صاف انکار کر دیا ہے۔

یہ تنازع ایک نجی ٹی وی پروگرام کے دوران شروع ہوا جب دیدار نے ریشم کو ٹاکسک شخصیت قرار دیتے ہوئے ان پر دوسروں کی زندگیاں برباد کرنے کا الزام عائد کیا۔ اس بیان کے بعد دونوں اداکاراؤں کے درمیان لفظی جنگ چھڑ گئی جو تاحال جاری ہے۔

معاملے کی سنگینی کو دیکھتے ہوئے صوبائی وزیر اطلاعات عظمیٰ بخاری نے دونوں فنکاروں کو غیر اخلاقی زبان کے استعمال سے گریز کرنے کی ہدایت کی اور دیدار سے مطالبہ کیا کہ وہ اپنے الفاظ پر معافی مانگیں۔ عظمیٰ بخاری نے ریشم کی فلاحی خدمات کو سراہتے ہوئے کہا کہ کسی خاتون کے کردار اور ان کے خیراتی کاموں پر تنقید کرنا غیر اخلاقی عمل ہے۔

ریشم نے صوبائی وزیر کی حمایت پر ان کا شکریہ ادا کرتے ہوئے کہا کہ ایسے مخلص دوست کسی نعمت سے کم نہیں۔

دوسری جانب دیدار نے معافی مانگنے کا مطالبہ مسترد کرتے ہوئے دو ٹوک الفاظ میں کہا کہ انہیں کوئی بھی ایسا کرنے پر مجبور نہیں کر سکتا۔ انسٹاگرام پر جاری ایک ویڈیو پیغام میں دیدار نے ریشم کے ماضی پر تنقید کرتے ہوئے دعویٰ کیا کہ ریشم ان کے گھر آتی جاتی تھیں اور ان کے قریبی تعلقات تھے۔ دیدار نے مزید کہا کہ سچ جلد سامنے آ جائے گا اور بہت سے لوگ حقیقت سے پہلے ہی آگاہ ہیں۔

اس معاملے پر سوشل میڈیا صارفین اور دونوں اداکاراؤں کے مداحوں کے درمیان بھی گرما گرم بحث جاری ہے اور تنازع تھمنے کے آثار دکھائی نہیں دے رہے۔