سندھ حکومت کا کفایت شعاری مہم کے تحت مارکیٹیں اور شاپنگ مالز رات 8 بجے بند کرنے کا فیصلہ

حکومت سندھ نے کفایت شعاری مہم کے تحت صوبے کے بڑے شہروں بشمول کراچی میں دکانوں اور شاپنگ مالز کو رات آٹھ بجے بند کرنے کا فیصلہ کیا ہے۔

جاری کردہ سرکاری اعلامیے کے مطابق مارکیٹوں، ہوٹلوں اور شادی ہالز کے لیے نئے اوقات کار کا اطلاق ہفتے کے ساتوں دن ہوگا۔

نئی پالیسی کے تحت چند ضروری خدمات کو ان پابندیوں سے مستثنیٰ قرار دیا گیا ہے۔ ان میں تندور، ڈیری شاپس، بیکریاں، میڈیکل اسٹورز، لیبارٹریز، کلینک، ہسپتال اور پیٹرول پمپس شامل ہیں۔

حکومت کی جانب سے واضح کیا گیا ہے کہ ہوٹل اور کھانے پینے کے مراکز رات سات بجے سے ساڑھے گیارہ بجے تک کھلے رہ سکیں گے جبکہ شادی ہالز اور بینکوئٹ ہالز میں تقریبات کا انعقاد رات آٹھ بجے سے بارہ بجے تک کیا جا سکے گا۔

اعلامیے میں مزید کہا گیا ہے کہ ہوم ڈیلیوری اور ٹیک اوے کی سہولیات پر کسی قسم کی کوئی پابندی نہیں ہوگی اور یہ خدمات حسب معمول جاری رہیں گی۔