تقسیمِ ہند کے آٹھ دہائیوں بعد سکھ یاتریوں کی آبائی وطن واپسی، یادیں تازہ ہو گئیں

بھارت سے سکھ یاتریوں کا ایک بڑا قافلہ واہگہ بارڈر کے راستے پاکستان پہنچ گیا ہے، جن میں تین ایسے بزرگ بھی شامل ہیں جن کی واپسی آٹھ دہائیوں پر محیط یادوں کو تازہ کر گئی۔ بابا کرنل سنگھ، بابا سردار شوبیک سنگھ اور سردار ہربنس سنگھ 1947 کی تقسیم کے بعد پہلی بار اپنے آبائی گاؤں پہنچے ہیں۔ ان کا تعلق لاہور کے نواحی گاؤں ڈوگیج واہگڑیاں سے ہے، جہاں سے نقل مکانی کے بعد وہ بھارت کے ضلع امرتسر کے علاقے شاہورہ میں آباد ہو گئے تھے۔

پاکستان کی جانب سے سکھ یاتریوں کو 2840 ویزے جاری کیے گئے تھے، تاہم 2238 یاتری پاکستان پہنچے جبکہ 600 سے زائد افراد ویزے ملنے کے باوجود سفر نہ کر سکے۔ واہگہ بارڈر پر آمد کے موقع پر ان بزرگوں کی آنکھیں نم ہو گئیں۔ بابا کرنل سنگھ نے اپنے بچپن کے گلی کوچوں اور کنویں کی یادیں تازہ کیں، جبکہ سردار شوبیک سنگھ نے اپنے مسلم دوستوں کا ذکر کرتے ہوئے کہا کہ ان سے دوبارہ نہ مل پانا ان کی زندگی کا سب سے بڑا ملال رہا ہے۔ سردار ہربنس سنگھ نے کہا کہ ان کی زندگی کی واحد خواہش اپنے جنم بھومی کو ایک بار پھر دیکھنا تھی۔

یاتریوں کا استقبال پاکستان سکھ گوردوارہ پربندھک کمیٹی کے صدر اور صوبائی وزیر اقلیتی امور سردار رمیش سنگھ اروڑا، ایڈیشنل سیکرٹری شرائنز ناصر مشتاق اور کمشنر لاہور مریم خان نے کیا۔ ناصر مشتاق نے بتایا کہ یاتریوں کے لیے رہائش، لنگر، ٹرانسپورٹ اور طبی سہولیات کے جامع انتظامات کیے گئے ہیں۔ مرکزی بیساکھی تقریب منگل کے روز حسن ابدال کے گوردوارہ پنجہ صاحب میں منعقد ہوگی۔

سردار رمیش سنگھ اروڑا نے کہا کہ پاکستان سکھ برادری کے لیے دوسرا نہیں بلکہ پہلا گھر ہے۔ انہوں نے کہا کہ کشیدہ تعلقات کے باوجود ہزاروں ویزوں کا اجراء پاکستان کے امن کے عزم کا منہ بولتا ثبوت ہے۔ انہوں نے مزید بتایا کہ اس سال 17 گوردوارے فعال کیے جا رہے ہیں جبکہ مزید 34 مقامات پر بحالی کا کام دو سال میں مکمل کر لیا جائے گا۔ انہوں نے بھارت پر زور دیا کہ وہ کرتارپور راہداری کو مکمل طور پر کھولے۔ اروڑا نے اس موقع پر وزیراعظم شہباز شریف اور آرمی چیف جنرل سید عاصم منیر کی سفارتی کوششوں کا بھی ذکر کیا۔

یاتری اپنے 10 روزہ قیام کے دوران ننکانہ صاحب اور پنجہ صاحب سمیت اہم مقامات کا دورہ کریں گے۔ بھارتی وفود کے قائدین سردار سرجیت سنگھ، سردار پرمجیت سنگھ چنڈوک اور سردار ہربجیت سنگھ نے پاکستانی حکام کی جانب سے بہترین انتظامات اور مہمان نوازی پر شکریہ ادا کیا۔ یاتریوں نے دونوں ممالک کے درمیان بہتر تعلقات اور مذہبی سیاحت کے لیے مزید آسانیوں کی امید ظاہر کی۔ سخت سیکیورٹی میں یاتریوں کو بسوں کے ذریعے حسن ابدال روانہ کر دیا گیا ہے جہاں وہ اپنی مذہبی رسومات ادا کریں گے۔