اکسٹھویں نیشنل ٹیبل ٹینس چیمپئن شپ: شاہ خان اور حائقہ حسن نے سنگلز ٹائٹل اپنے نام کر لیے

اکسٹھویں نیشنل ٹیبل ٹینس چیمپئن شپ میں پاکستان آرمی کے شاہ خان اور ہائقہ حسن نے بالترتیب مردوں اور خواتین کے سنگلز ٹائٹل اپنے نام کر لیے جبکہ واپڈا نے ٹیم ایونٹس اور خواتین کے ڈبلز میں شاندار کارکردگی کا مظاہرہ کرتے ہوئے ٹرافیاں جیت لیں۔

پشاور اسپورٹس کمپلیکس کے پی ایس بی ہال میں کھیلے گئے مردوں کے سنگلز فائنل میں آرمی کے شاہ خان نے اپنے ہی ساتھی عباس امجد کو سنسنی خیز مقابلے کے بعد چار تین سے شکست دے کر چیمپئن شپ اپنے نام کی۔ خواتین کے سنگلز فائنل میں آرمی کی ہائقہ حسن نے واپڈا کی بسمہ فریال کو چار دو سے زیر کیا۔

خواتین کے ڈبلز فائنل میں واپڈا کی پرانیہ زمان اور بسمہ فریال کی جوڑی نے آرمی کی ہائقہ حسن اور ایمن حسن کو شکست دے کر طلائی تمغہ حاصل کیا۔

ٹیم ایونٹس میں بھی واپڈا کا پلڑا بھاری رہا۔ مردوں کے ٹیم فائنل میں واپڈا کے طلحہ بلال، عاصم قریشی اور عبید شاہ نے پنجاب کی ٹیم کے اویس حسن، تیمور خان اور ابو ہریرہ کو چار دو سے شکست دی۔ خواتین کے ٹیم فائنل میں واپڈا کی بسمہ فریال، عائشہ شرجیل اور پرانیہ زمان نے پنجاب کی کلثوم خان، زہرہ بتول اور عدن شہزادی کو ہرا کر ٹرافی اپنے نام کی۔

چیمپئن شپ کی اختتامی تقریب کے مہمان خصوصی مشیر وزیر اعلیٰ خیبر پختونخوا برائے کھیل و امور نوجوانان تاج محمد ترند تھے، جنہوں نے کھلاڑیوں میں انعامات تقسیم کیے۔ اس موقع پر ڈائریکٹر جنرل اسپورٹس تشفین حیدر، پاکستان ٹیبل ٹینس فیڈریشن کے سیکرٹری جنرل اعجاز احمد اور نائب صدر و آرگنائزر کفایت اللہ سمیت دیگر شخصیات موجود تھیں۔

تقریب سے خطاب کرتے ہوئے تاج محمد ترند نے خیبر پختونخوا میں نیشنل چیمپئن شپ کے کامیاب انعقاد پر اطمینان کا اظہار کیا۔ انہوں نے کہا کہ صوبائی حکومت کھیلوں کے فروغ اور انفراسٹرکچر کی بہتری کے لیے بھرپور توجہ دے رہی ہے تاکہ کھلاڑیوں کو بہترین سہولیات میسر آ سکیں۔ انہوں نے مزید کہا کہ صوبے بھر میں کھیلوں کی سرگرمیاں جاری رہیں گی اور نئے ٹیلنٹ کو تلاش کرنے اور نکھارنے کے لیے مزید اقدامات اٹھائے جائیں گے۔