پنجاب: اسکول ٹرانسپورٹ کی عدم فراہمی، بچوں کی زندگیوں کو شدید خطرات لاحق

پنجاب بھر کے سرکاری و نجی تعلیمی اداروں میں اسکول ٹرانسپورٹ کی عدم فراہمی سنگین مسئلہ بن چکی ہے۔ لاہور ہائی کورٹ کی جانب سے طلبہ کی محفوظ سفری سہولت کو یقینی بنانے کے واضح احکامات کے باوجود زمینی حقائق اس کے برعکس ہیں۔ اسکول انتظامیہ کی جانب سے ٹرانسپورٹ کا انتظام نہ ہونے کے باعث طلبہ غیر محفوظ سواریوں میں سفر کرنے پر مجبور ہیں۔

والدین اور شہریوں نے اس صورتحال پر شدید تشویش کا اظہار کیا ہے۔ محمد اعجاز نامی شہری کا کہنا ہے کہ ان کے بچے رکشوں، چنگ چی، اور پک اپ ٹرکوں میں سفر کرتے ہیں جہاں آٹھ سے دس بچوں کو ٹھونس دیا جاتا ہے۔ انہوں نے کہا کہ نہ تو کوئی حفاظتی اقدامات موجود ہیں اور نہ ہی اسکول یا حکومت اس غفلت کا نوٹس لے رہی ہے۔

ایک والدہ سلمیٰ بی بی نے بتایا کہ اسکول فیسوں میں مسلسل اضافے کے باوجود سہولیات کا فقدان ہے۔ انہوں نے کہا کہ پیٹرول اور ڈیزل کی قیمتیں بڑھتے ہی ٹرانسپورٹرز کرایوں میں من مانا اضافہ کر دیتے ہیں، جبکہ اسکول انتظامیہ بسیں فراہم کرنے میں مکمل ناکام ہے۔ طلبہ نے بھی شکایت کی ہے کہ موسم کی سختیوں کے باوجود غیر محفوظ سفری ذرائع استعمال کرنے سے نہ صرف ان کی صحت متاثر ہوتی ہے بلکہ بروقت اسکول نہ پہنچنے سے تعلیمی نقصان بھی ہوتا ہے۔

پنجاب ٹیچرز یونین کے جنرل سیکرٹری رانا لیاقت علی نے انکشاف کیا کہ دو برس قبل حکومت نے نجی اسکولوں کو بسیں فراہم کرنے کا پابند کیا تھا، مگر کسی نے عمل نہیں کیا۔ انہوں نے کہا کہ بچے موٹر سائیکل رکشوں اور گاڑیوں کی چھتوں پر سفر کرنے پر مجبور ہیں، جبکہ گاڑیوں میں غیر معیاری ایل پی جی سلنڈرز کا استعمال کسی بڑے حادثے کا پیش خیمہ ہے۔

تعلیمی ماہرین کا کہنا ہے کہ اسکول ٹرانسپورٹ اب ایک بنیادی ضرورت بن چکی ہے۔ اگر حکومت واضح پالیسی مرتب کرے تو نہ صرف طلبہ کی زندگیوں کو محفوظ بنایا جا سکتا ہے بلکہ ٹریفک کے مسائل میں بھی کمی آئے گی۔ ماحولیاتی ماہر نسیم الرحمان کے مطابق ایک اسکول بس درجنوں نجی گاڑیوں کی جگہ لے سکتی ہے، جس سے اسموگ اور فضائی آلودگی میں بھی نمایاں کمی لائی جا سکتی ہے۔

محکمہ تعلیم کی جانب سے اس معاملے پر عدم سنجیدگی کا یہ عالم ہے کہ اب تک کوئی مانیٹرنگ سسٹم قائم نہیں کیا جا سکا اور نہ ہی گاڑیوں میں بچوں کی تعداد کے حوالے سے کوئی ضابطہ اخلاق موجود ہے۔ شہریوں نے حکومت پنجاب سے مطالبہ کیا ہے کہ لاہور ہائی کورٹ کے احکامات پر فوری عملدرآمد کرایا جائے اور اسکولوں کو ٹرانسپورٹ کی فراہمی کا پابند بنایا جائے تاکہ والدین کا اعتماد بحال ہو سکے۔