ڈیزل کی قیمتوں میں بڑی کمی، ایف پی سی سی آئی کا خیرمقدم، برآمدات میں اضافے کا امکان

فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) کے صدر عاطف اکرام شیخ نے ہائی اسپیڈ ڈیزل کی قیمت میں 134 روپے 81 پیسے فی لیٹر کی نمایاں کمی کے حکومتی فیصلے کا خیرمقدم کیا ہے۔ انہوں نے کہا کہ ایف پی سی سی آئی نے دو اپریل کو ایندھن کی قیمتوں میں کیے گئے اضافے کو سختی سے مسترد کیا تھا اور اب قیمتوں میں اس کمی سے تجارت اور صنعت کو درکار ریلیف ملے گا۔

ایف پی سی سی آئی کے صدر کے مطابق ہائی اسپیڈ ڈیزل کی قیمت 520 روپے 35 پیسے سے کم ہو کر 385 روپے 54 پیسے پر آ گئی ہے، جو معیشت کے لیے ایک خوش آئند پیش رفت ہے۔ انہوں نے پیٹرول کی قیمت میں 11 روپے 83 پیسے کی کمی کو بھی سراہا اور مطالبہ کیا کہ عالمی منڈی میں تیل کی قیمتوں کے استحکام تک پیٹرولیم ڈویلپمنٹ لیوی میں مزید کمی یا اسے عارضی طور پر معطل کیا جائے۔

عاطف اکرام شیخ نے واضح کیا کہ ڈیزل ملکی معیشت کی ریڑھ کی ہڈی ہے اور اس کی قیمتوں میں اضافے نے ٹیکسٹائل اور مینوفیکچرنگ سیکٹرز کو شدید متاثر کیا تھا۔ انہوں نے امید ظاہر کی کہ قیمتوں میں حالیہ کمی سے پیداواری لاگت میں پانچ سے دس فیصد تک کمی آئے گی، جس سے ملکی برآمدات کو عالمی منڈی میں مسابقتی فائدہ حاصل ہوگا۔

ایف پی سی سی آئی کے سینئر نائب صدر ثاقب فیاض مگو نے کہا کہ ایندھن کے بحران کے دوران ٹرانسپورٹ کے کرایوں میں 60 فیصد تک اضافہ ہوا تھا، جس نے سپلائی چین کو بری طرح متاثر کیا۔ انہوں نے کہا کہ ڈیزل کی قیمت 385 روپے 54 پیسے پر آنے سے خام مال اور تیار شدہ مصنوعات کی نقل و حمل کے اخراجات میں اصلاح ہوگی، جس کا براہِ راست فائدہ چھوٹے اور درمیانے درجے کے کاروباروں کو پہنچے گا۔

ایف پی سی سی آئی کے نائب صدر اور ریجنل چیئرمین سندھ عبدالمنعم خان نے کہا کہ ایندھن کی قیمتوں میں کمی کا سب سے زیادہ فائدہ زرعی شعبے اور بھاری صنعتوں کو ہوگا۔ انہوں نے بتایا کہ ڈیزل کی قیمتوں میں اضافے کے باعث کاشتکاروں کے لیے ٹریکٹر اور ٹیوب ویل چلانا ناممکن ہو گیا تھا، تاہم اب کٹائی کے سیزن سے قبل اخراجات میں کمی سے کسانوں کو بڑی ریلیف ملے گی۔

ایف پی سی سی آئی قیادت نے حکومت پر زور دیا کہ عالمی منڈی میں تیل کی قیمتوں میں کمی کا فائدہ جلد از جلد مقامی صنعت تک پہنچانے کا سلسلہ جاری رکھا جائے تاکہ معاشی پہیہ رواں دواں رہے۔