وزیر خزانہ محمد اورنگزیب نے کہا ہے کہ سعودی عرب کی جانب سے تین ارب ڈالر کا مالی امدادی پیکیج آئندہ ہفتے پاکستان کو موصول ہونے کی توقع ہے۔
واشنگٹن میں پاکستانی سفارت خانے میں گفتگو کرتے ہوئے وزیر خزانہ نے بتایا کہ ان کی سعودی ہم منصب کے ساتھ تفصیلی بات چیت ہوئی ہے اور گزشتہ جمعہ کو اسلام آباد میں بھی اس حوالے سے ایک اہم ملاقات ہوئی تھی۔
محمد اورنگزیب نے تصدیق کی کہ سعودی وزیر خزانہ نے واضح کیا ہے کہ تین ارب ڈالر کی یہ معاونت اضافی ڈپازٹس کی شکل میں فراہم کی جائے گی۔
وزیر خزانہ نے مزید کہا کہ پاکستان نے گزشتہ ایک ہفتے کے دوران ایک ارب چالیس کروڑ ڈالر کی ادائیگیاں کی ہیں اور ملک اپنی تمام بیرونی ذمہ داریاں وقت پر پوری کرے گا۔
ان کا کہنا تھا کہ پانچ ارب ڈالر کی سعودی ڈپازٹ سہولت کو ایک سالہ رول اوور کے بجائے تین سالہ مدت تک بڑھایا جا رہا ہے جس کے بعد اس کی میچورٹی کی تاریخ 2028 تک منتقل ہو جائے گی اور سالانہ تجدید کی ضرورت نہیں رہے گی۔
وزیر خزانہ نے مشکل وقت میں پاکستان کی مسلسل حمایت پر سعودی حکومت، ولی عہد محمد بن سلمان اور سعودی وزیر خزانہ کا خصوصی شکریہ ادا کیا۔
