آزاد کشمیر پولیس کی کارروائی، بھارتی خفیہ ایجنسی ‘را’ کا جاسوس گرفتار

آزاد کشمیر پولیس نے جمعرات کے روز ایک بڑی کارروائی کے دوران بھارتی خفیہ ایجنسی را کے لیے جاسوسی میں ملوث ایک ملزم کو گرفتار کرنے کا دعوی کیا ہے۔ حکام کے مطابق اس گرفتاری سے ایک وسیع جاسوسی نیٹ ورک کا سراغ لگایا گیا ہے جسے ناکارہ بنا دیا گیا ہے۔

انسپکٹر جنرل آزاد کشمیر پولیس لیاقت علی ملک نے مظفرآباد میں پریس کانفرنس سے خطاب کرتے ہوئے بتایا کہ ملزم عرفان کو راولاکوٹ پولیس نے حراست میں لیا ہے۔ ملزم طویل عرصے سے پاکستان مخالف سرگرمیوں اور جاسوسی میں مصروف عمل تھا۔

آئی جی پولیس نے انکشاف کیا کہ ملزم سوشل میڈیا کے ذریعے اپنے ہینڈلرز کے ساتھ رابطے میں تھا اور حساس تنصیبات کی ریکی کرنے کے بعد ان کی ویڈیوز اور مقامات کی تفصیلات دشمن ملک کو فراہم کرتا رہا۔

لیاقت علی ملک نے مزید بتایا کہ ملزم نے بچوں کو پیسوں کا لالچ دے کر تخریبی کارروائیوں کے لیے بھرتی کرنے کی بھی کوشش کی۔ پولیس کی جانب سے ملزم کا اعترافی بیان بھی جاری کیا گیا ہے جس میں اس نے تسلیم کیا کہ اسے آن لائن ملازمت کا جھانسہ دے کر اس نیٹ ورک میں شامل کیا گیا تھا۔

پولیس حکام کا کہنا ہے کہ خطے کے امن کو داؤ پر لگانے والے کسی بھی عنصر کو برداشت نہیں کیا جائے گا۔ اس نیٹ ورک سے منسلک دیگر افراد کی نشاندہی کے لیے تفتیش کا دائرہ کار وسیع کر دیا گیا ہے اور سیکیورٹی ادارے مکمل طور پر چوکس ہیں۔