وزیراعظم شہباز شریف کی انطالیہ میں ترک صدر رجب طیب اردوان سے ملاقات، دوطرفہ تعلقات کے فروغ پر اتفاق

انٹالیا میں جاری ڈپلومیسی فورم کے موقع پر وزیراعظم شہباز شریف اور ترک صدر رجب طیب اردوان کے درمیان اہم ملاقات ہوئی جس میں دوطرفہ تعلقات اور خطے کی بدلتی ہوئی صورتحال پر تفصیلی تبادلہ خیال کیا گیا۔ ملاقات میں دونوں رہنماؤں نے باہمی دلچسپی کے امور اور علاقائی استحکام کے لیے مشترکہ کوششوں کو مزید مستحکم کرنے پر اتفاق کیا۔

پاکستانی وفد میں نائب وزیراعظم و وزیر خارجہ اسحاق ڈار اور وزیر اطلاعات عطا اللہ تارڑ سمیت اعلیٰ حکام شامل تھے جبکہ ترک جانب سے وزیر خارجہ اور دیگر اعلیٰ عہدیداران شریک ہوئے۔ ترک صدر رجب طیب اردوان نے وزیراعظم شہباز شریف کی فورم میں شرکت کو سراہتے ہوئے خطے میں امن و استحکام کے لیے پاکستان کی سفارتی کوششوں کی مکمل حمایت کا اعادہ کیا۔

وزیراعظم شہباز شریف نے پرتپاک استقبال اور میزبانی پر ترک قیادت کا شکریہ ادا کیا۔ انہوں نے انٹالیا ڈپلومیسی فورم کے کامیاب انعقاد پر ترک صدر کو مبارکباد پیش کرتے ہوئے کہا کہ یہ فورم عالمی سطح پر مکالمے اور تعاون کا ایک اہم پلیٹ فارم بن چکا ہے۔ صدر اردوان نے بھی اس بات کا اعادہ کیا کہ یہ فورم بین الاقوامی مسائل کے حل کے لیے کلیدی حیثیت اختیار کر چکا ہے۔

ملاقات کے دوران مشرق وسطیٰ کی کشیدہ صورتحال اور خطے میں پائیدار امن کے قیام کے لیے مستقل سفارتی رابطوں کی اہمیت پر زور دیا گیا۔ دونوں رہنماؤں نے پاک ترک دوطرفہ تعلقات کی موجودہ رفتار پر اطمینان کا اظہار کیا اور رواں برس انقرہ میں ہائی لیول اسٹریٹجک کوآپریشن کونسل کا آٹھواں اجلاس منعقد کرنے پر اتفاق کیا۔

وزیراعظم شہباز شریف اور صدر رجب طیب اردوان نے اس عزم کا اعادہ کیا کہ پاکستان اور ترکیہ کے مابین دیرینہ اسٹریٹجک شراکت داری کو مزید گہرا کیا جائے گا اور مختلف شعبوں میں تعاون کے دائرہ کار کو وسیع کرنے کے لیے مشترکہ کاوشیں جاری رکھی جائیں گی۔