انطالیہ: وزیراعظم شہباز شریف کی عالمی رہنماؤں سے غیر رسمی ملاقاتیں

انٹالیا ڈپلومیسی فورم کے موقع پر وزیراعظم محمد شہباز شریف کی عالمی رہنماؤں سے اہم ملاقاتیں ہوئی ہیں، جن میں دو طرفہ تعلقات کے فروغ اور باہمی تعاون کو مزید مستحکم کرنے پر اتفاق کیا گیا ہے۔

وزیراعظم آفس کی جانب سے جاری کردہ اعلامیے کے مطابق انٹالیا میں منعقدہ فورم کے دوران وزیراعظم شہباز شریف نے ترکیہ کے صدر رجب طیب اردوان، قطر کے امیر شیخ تمیم بن حمد الثانی، قازقستان کے صدر قاسم جومارت توکایف، آذربائیجان کے صدر الہام علیوف اور شام کے صدر احمد الشرع سے ملاقاتیں کیں۔

اس کے علاوہ وزیراعظم نے قطر کے وزیراعظم و وزیر خارجہ محمد بن عبدالرحمن بن جاسم الثانی اور کوسوو کی صدر وجوسا عثمانی سے بھی الگ الگ ملاقاتیں کیں۔

ملاقاتیں انتہائی خوشگوار اور دوستانہ ماحول میں منعقد ہوئیں۔ ان نشستوں کے دوران وزیراعظم شہباز شریف فورم میں شریک رہنماؤں کے درمیان توجہ کا مرکز بنے رہے۔

بات چیت میں علاقائی اور عالمی سطح پر رونما ہونے والی پیش رفت کا جائزہ لیا گیا جبکہ سیاسی، اقتصادی اور سکیورٹی کے شعبوں میں باہمی تعاون کو مزید وسعت دینے پر غور کیا گیا۔ ان ملاقاتوں کے ذریعے پاکستان نے علاقائی اور عالمی امور پر اپنی سفارتی سرگرمیوں کو ایک بار پھر اجاگر کیا ہے۔