عالمی منڈی میں تیزی کے بعد پاکستان میں سونے کی قیمتوں میں بڑا اضافہ

پاکستان میں سونے کی قیمتوں میں ہفتے کے روز ایک بار پھر نمایاں اضافہ ریکارڈ کیا گیا ہے جس کی بنیادی وجہ عالمی مارکیٹ میں پیلی دھات کے نرخوں میں تیزی ہے۔

آل پاکستان جیمز اینڈ جیولرز صرافہ ایسوسی ایشن کے جاری کردہ اعداد و شمار کے مطابق مقامی صرافہ بازاروں میں سونے کی فی تولہ قیمت 4500 روپے اضافے کے بعد 5 لاکھ 6 ہزار 62 روپے ہو گئی ہے۔

اسی طرح 10 گرام سونے کے نرخ بھی 3858 روپے بڑھ کر 4 لاکھ 33 ہزار 866 روپے کی سطح پر پہنچ گئے ہیں۔

یاد رہے کہ گزشتہ سیشن کے دوران سونے کی قیمت میں 3300 روپے کی کمی واقع ہوئی تھی جس کے بعد فی تولہ قیمت 5 لاکھ ایک ہزار 562 روپے پر بند ہوئی تھی۔

عالمی منڈی کے حوالے سے ایسوسی ایشن نے بتایا کہ بین الاقوامی مارکیٹ میں سونے کی قیمت 45 ڈالر اضافے کے بعد 4837 ڈالر فی اونس تک پہنچ گئی ہے جس میں 20 ڈالر کا پریمیم بھی شامل ہے۔

ملک میں چاندی کی قیمتوں میں بھی تیزی کا رجحان دیکھا گیا ہے۔ چاندی 118 روپے اضافے کے بعد 8562 روپے فی تولہ پر فروخت ہو رہی ہے۔

ماہرین کا کہنا ہے کہ عالمی بلین مارکیٹ میں جاری اتار چڑھاؤ کے اثرات مقامی منڈی پر مرتب ہو رہے ہیں جس کے باعث قیمتوں میں یہ ردوبدل دیکھنے میں آیا ہے۔