پی ایم اے کاکول میں 153 ویں لانگ کورس کی پاسنگ آؤٹ پریڈ کا انعقاد

پاکستان ملٹری اکیڈمی کاکول میں ہفتے کے روز پاسنگ آؤٹ پریڈ کا پروقار انعقاد کیا گیا۔ تقریب کے مہمان خصوصی چیف آف ایئر اسٹاف ایئر چیف مارشل ظہیر احمد بابر سدھو تھے۔ اس موقع پر 153 ویں پی ایم اے لانگ کورس سمیت دیگر کورسز کے کیڈٹس نے تربیت مکمل کرنے کے بعد عملی زندگی میں قدم رکھا۔

اکیڈمی کی بین الاقوامی حیثیت کو اجاگر کرتے ہوئے عراق، مالدیپ، مالی، نیپال، فلسطین، قطر اور سری لنکا کے کیڈٹس نے بھی کامیابی کے ساتھ پاسنگ آؤٹ مکمل کی۔ ایئر چیف مارشل ظہیر احمد بابر سدھو نے پریڈ کا معائنہ کیا اور نمایاں کارکردگی دکھانے والے کیڈٹس میں اعزازات تقسیم کیے۔

اکیڈمی سینئر انڈر آفیسر بلال نسیم نے اعزازی شمشیر حاصل کی، جبکہ بٹالین سینئر انڈر آفیسر محمد سعد موسیٰ کو صدر کے گولڈ میڈل سے نوازا گیا۔ غیر ملکی کیڈٹس میں سے نیپال کے سینئر انڈر آفیسر روبن کنور کو چیف آف ڈیفنس فورسز اوورسیز گولڈ میڈل دیا گیا۔

دیگر اعزازات میں جینٹلمین کیڈٹ مسعود الرحمٰن کو مارکس مین میڈل جبکہ 38 ویں ٹیکنیکل گریجویٹ کورس کے کورس انڈر آفیسر حیدر بن عابد کو چیف آف آرمی اسٹاف کین سے نوازا گیا۔ اس کے علاوہ مجاہد، انٹیگریٹڈ اور لیڈی کیڈٹ پروگرامز کے کیڈٹس کو بھی ان کی شاندار کارکردگی پر اعزازات سے نوازا گیا۔