اسلام آباد: حفاظتی وجوہات کے پیش نظر ہائیکنگ ٹریلز غیر معینہ مدت کے لیے بند

وفاقی دارالحکومت اسلام آباد کی ضلعی انتظامیہ نے عوامی تحفظ اور انتظامی امور کے پیش نظر شہر کے متعدد مقبول ہائیکنگ ٹریلس کو غیر معینہ مدت کے لیے بند کرنے کا اعلان کر دیا ہے۔ یہ پابندی بیس اپریل دو ہزار چھبیس سے فوری طور پر نافذ العمل ہو گی۔

انتظامیہ کی جانب سے جاری کردہ نوٹیفکیشن کے مطابق ٹریل ٹو، ٹریل تھری، ٹریل فور، ٹریل فائیو اور سید پور گاؤں کے عقب میں واقع ٹریل کو مکمل طور پر بند کر دیا گیا ہے۔ ان راستوں پر کسی بھی قسم کی عوامی سرگرمیوں پر سخت پابندی عائد کر دی گئی ہے جو آئندہ احکامات تک برقرار رہے گی۔

اس فیصلے پر عمل درآمد کو یقینی بنانے کے لیے چیف کمشنر آفس، اسلام آباد پولیس، کیپٹل ڈویلپمنٹ اتھارٹی، وزارت داخلہ اور پیمرا کو خصوصی ہدایات جاری کر دی گئی ہیں۔ متعلقہ حکام کو ہدایت کی گئی ہے کہ وہ بند کیے گئے ٹریلس پر سیکیورٹی کے سخت انتظامات کو یقینی بنائیں۔

انتظامیہ نے شہریوں سے اپیل کی ہے کہ وہ ان احکامات کی مکمل پاسداری کریں اور پابندی کے دوران ان راستوں پر جانے سے گریز کریں۔ خلاف ورزی کی صورت میں ضابطے کے مطابق کارروائی عمل میں لائی جائے گی۔