اسحاق ڈار اور آسٹریلوی وزیر خارجہ کا عالمی معاشی صورتحال پر تبادلہ خیال، مذاکرات پر زور

آسٹریلیا کی وزیر خارجہ پینی وونگ نے نائب وزیراعظم اور وزیر خارجہ سینیٹر محمد اسحاق ڈار کے ساتھ ٹیلی فونک گفتگو کے دوران ایران اور امریکہ کے مابین مذاکرات کی سہولت کاری میں پاکستان کے تعمیری کردار کی تعریف کی ہے۔

دفتر خارجہ کی جانب سے جاری اعلامیے کے مطابق آسٹریلوی ہم منصب نے خطے میں سفارتی کوششوں کے فروغ کے لیے پاکستان کے عزم کو سراہا۔ گفتگو کے دوران وزیر خارجہ اسحاق ڈار نے پینی وونگ کو گیارہ اور بارہ اپریل کو منعقد ہونے والے اسلام آباد ٹاکس کے بارے میں بریفنگ دی اور اس عزم کا اعادہ کیا کہ پاکستان تعمیری مشغولیت اور بات چیت کے عمل کو فروغ دینے کے لیے اپنا کردار ادا کرتا رہے گا۔

دونوں رہنماؤں نے عالمی معیشت پر پڑنے والے اثرات بالخصوص ترقی پذیر ممالک کی مشکلات پر گہری تشویش کا اظہار کیا اور تنازعات کے پرامن حل کی اہمیت پر زور دیا۔

پاکستان اس وقت ایران، امریکہ اور اسرائیل کے درمیان بڑھتے ہوئے بحران میں ثالثی کے اہم کردار کے طور پر ابھرا ہے۔ گزشتہ ایک ہفتے کے دوران سعودی عرب، ایران، امریکہ، چین، ترکی، آذربائیجان، بحرین، ازبکستان اور مصر سمیت دس سے زائد ممالک کے اعلیٰ حکام نے جنگ بندی کے مذاکرات میں اسحاق ڈار کی کاوشوں کا اعتراف کیا ہے۔

دریں اثنا اسلام آباد میں ایران اور امریکہ کے مابین مذاکرات کے دوسرے دور کی تیاریاں جاری ہیں۔ واشنگٹن نے تصدیق کی ہے کہ امریکی نائب صدر جے ڈی وینس کی قیادت میں ایک اعلیٰ سطح کا وفد پاکستان پہنچے گا، جس سے اس بات کا اشارہ ملتا ہے کہ پاکستان واشنگٹن اور تہران کے درمیان ایک غیر جانبدار اور ایماندار ثالث کے طور پر اپنی پوزیشن مستحکم کر چکا ہے۔

اگرچہ پہلے مرحلے کے دوران پابندیوں، سمندری سکیورٹی اور علاقائی اثر و رسوخ جیسے معاملات پر گہرے اختلافات سامنے آئے تھے، تاہم حکام کا کہنا ہے کہ دونوں فریقین نے سخت عوامی بیانات کے باوجود سفارتی چینلز کو کھلا رکھا ہوا ہے، جس سے اگلے مرحلے میں پیش رفت کی امید کی جا رہی ہے۔