وزیراعظم شہباز شریف اور یورپی کونسل کے صدر کا مشرقِ وسطیٰ کی صورتحال پر تبادلہ خیال

وزیراعظم شہباز شریف اور یورپی کونسل کے صدر انتونیو کوسٹا کے درمیان ٹیلی فون پر رابطہ ہوا ہے جس میں مشرق وسطیٰ کی بدلتی ہوئی صورتحال پر تفصیلی تبادلہ خیال کیا گیا ہے۔ دونوں رہنماؤں نے خطے میں قیام امن کے لیے سفارتی کوششوں کو جاری رکھنے پر اتفاق کیا ہے۔

وزیراعظم آفس کی جانب سے جاری کردہ بیان کے مطابق وزیراعظم شہباز شریف نے انتونیو کوسٹا کو خطے میں امن اور استحکام کے فروغ کے لیے پاکستان کی سفارتی کوششوں اور اقدامات سے آگاہ کیا۔

یورپی کونسل کے صدر نے خطے میں کشیدگی کم کرنے اور مذاکرات کی حوصلہ افزائی کے لیے پاکستان کے تعمیری کردار کو سراہا۔ انہوں نے علاقائی استحکام کو یقینی بنانے کے لیے یورپی یونین کی جانب سے ہر ممکن تعاون کا یقین دلایا۔

دونوں رہنماؤں نے اس بات پر اتفاق کیا کہ پائیدار امن کے حصول اور کشیدگی میں مزید اضافے کو روکنے کے لیے بات چیت کا عمل ناگزیر ہے۔ اس اہم مسئلے پر دونوں جانب سے مسلسل رابطے میں رہنے کا فیصلہ کیا گیا ہے۔