معرکہ حق: کیپٹن ارباز خان نے پاک فوج کی بہادری اور قربانیوں کی یادیں تازہ کر دیں

لاہور (نمائندہ خصوصی) پاک فوج کے بہادر افسر کیپٹن ارباز خان نے معرکہ حق کے دوران جوانوں کی شاندار جرات اور بہادری کی داستانوں کو تازہ کر دیا۔ آپریشن بنیان المرصوص کی پہلی برسی کے موقع پر قوم سے گفتگو کرتے ہوئے کیپٹن ارباز خان کا کہنا تھا کہ اس معرکے کے بعد ان کے حوصلے مزید بلند ہوئے ہیں۔

کیپٹن ارباز خان نے محاذ پر درپیش مشکل حالات کا ذکر کرتے ہوئے بتایا کہ جب انہیں احکامات موصول ہوئے تو دشمن کے ڈرونز ان کے گن پلیٹ فارم کے اوپر پرواز کر رہے تھے۔ انہوں نے کہا کہ اس نازک صورتحال کے باوجود ہم نے جوابی کارروائی کی جو ہماری تربیت اور مکمل تیاری کا منہ بولتا ثبوت تھی۔

ان کی غیر معمولی بہادری اور فرض شناسی کے اعتراف میں انہیں چیف آف آرمی اسٹاف کمینڈیشن کارڈ سے نوازا گیا ہے۔ یہ اعزاز ان کی فرض سے بڑھ کر دکھائی گئی جرات اور خدمات کا اعتراف ہے۔

بھارت کے آپریشن سندور کے جواب میں پاک فوج کی تیز رفتار اور موثر جوابی کارروائی نے دشمن کو شدید ہزیمت سے دوچار کیا اور اسے پسپائی پر مجبور کر دیا۔