خطے میں کشیدگی: اسحاق ڈار اور روسی ہم منصب سرگئی لاوروف کا ٹیلی فونک رابطہ

نائب وزیراعظم اور وزیر خارجہ اسحاق ڈار نے روس کے وزیر خارجہ سرگئی لاوروف کے ساتھ ٹیلی فون پر تفصیلی رابطہ کیا ہے جس میں دوطرفہ تعلقات اور کثیر الجہتی فورمز پر تعاون بڑھانے پر اتفاق کیا گیا ہے۔ گفتگو کے دوران دونوں رہنماؤں نے عالمی امن و سلامتی کے لیے اپنی وابستگی کا اعادہ کیا اور سیاسی، اقتصادی اور اسٹریٹجک شعبوں میں تعلقات کو مزید مستحکم کرنے پر زور دیا۔

روسی وزیر خارجہ نے ایران اور امریکہ کے درمیان کشیدگی کم کرنے اور مذاکرات کی سہولت کاری میں پاکستان کے تعمیری سفارتی کردار کو سراہا۔ اسحاق ڈار نے واضح کیا کہ تنازعات کے حل اور خطے میں پائیدار استحکام کے لیے سفارتی رابطے ناگزیر ہیں۔ دونوں وزرائے خارجہ نے وزیراعظم شہباز شریف کے دورہ روس کے شیڈول پر بھی تبادلہ خیال کیا اور جلد از جلد نئی تاریخ طے کرنے پر اتفاق کیا۔ اسحاق ڈار نے روسی ہم منصب کو پاکستان کا دورہ کرنے کی باضابطہ دعوت بھی دی۔

علاوہ ازیں اسحاق ڈار نے ایرانی وزیر خارجہ عباس عراقچی سے بھی ٹیلی فونک رابطہ کیا جس میں خطے کی موجودہ صورتحال اور جنگ بندی کے امور پر بات چیت کی گئی۔ اس موقع پر ایرانی وزیر خارجہ نے علاقائی سفارت کاری میں پاکستان کی کوششوں کی تعریف کی۔ عباس عراقچی نے ایران کی اندرونی صورتحال پر بات کرتے ہوئے کہا کہ بیرونی دباؤ کے باوجود ایرانی ادارے متحد اور منظم ہیں اور ملک کے عسکری و سفارتی محاذوں پر مربوط انداز میں کام جاری ہے۔

پاکستان کی قیادت حالیہ ہفتوں کے دوران مختلف عالمی اسٹیک ہولڈرز کے ساتھ فعال رابطوں میں مصروف ہے تاکہ بڑھتی ہوئی جغرافیائی سیاسی کشیدگی کے تناظر میں خطے میں ڈی ایسکلیشن اور مذاکرات کی راہ ہموار کی جا سکے۔ اس ضمن میں ایرانی وزیر خارجہ کا دورہ اسلام آباد بھی متوقع ہے جس میں امریکہ اور ایران کے درمیان جاری رابطوں کے اگلے مرحلے پر غور کیا جائے گا۔