عوامی حقوق کی جدوجہد جاری رکھیں گے، مولانا فضل الرحمان

جمعیت علماء اسلام ف کے سربراہ مولانا فضل الرحمان نے کہا ہے کہ ملک میں جاری اہم سفارتی مصروفیات کے پیش نظر مہنگائی کے خلاف ملک گیر احتجاجی تحریک کو فی الحال ملتوی کر دیا گیا ہے۔

لودھراں میں میڈیا سے گفتگو کرتے ہوئے مولانا فضل الرحمان کا کہنا تھا کہ ان کی جماعت عوام کے حقوق کے لیے جدوجہد جاری رکھے گی۔ انہوں نے واضح کیا کہ بلدیاتی انتخابات ایک آئینی اور قانونی معاملہ ہے جس پر صوبائی حکومت کے حتمی فیصلے کے بعد ہی پارٹی اپنی رائے کا اظہار کرے گی۔

مولانا فضل الرحمان نے موجودہ عالمی صورتحال کو غیر یقینی اور عدم استحکام کا شکار قرار دیتے ہوئے کہا کہ پاکستان میں تمام معاملات آئین کی بالادستی اور قانون کی حکمرانی کے تابع ہونے چاہئیں۔ انہوں نے اس بات پر زور دیا کہ کسی ایک ادارے کا غلبہ مسائل کا حل نہیں ہے اور ملک میں پارلیمانی بالادستی کا قیام ناگزیر ہے۔

ایک سوال کے جواب میں انہوں نے کہا کہ امن و امان کا قیام مکمل طور پر صوبائی ذمہ داری ہے اور اس ضمن میں صوبائی خودمختاری کا احترام کیا جانا چاہیے۔ انہوں نے اس عزم کا اعادہ کیا کہ جمعیت علماء اسلام عوام کو تنہا نہیں چھوڑے گی اور ہر مشکل وقت میں عوام کے ساتھ کھڑی رہے گی۔

اس سے قبل مولانا فضل الرحمان نے لودھراں میں جے یو آئی کے مقامی رہنما میاں محمد کے گھر کا دورہ کیا اور ان کے انتقال پر لواحقین سے تعزیت کی۔ انہوں نے مرحوم کے درجات کی بلندی کے لیے دعا کی اور سوگوار خاندان کے لیے صبر جمیل کی استدعا کی۔