پنجاب میں دفعہ 144 اور ڈرون اڑانے پر پابندی میں 30 روز کی توسیع

پنجاب حکومت نے صوبہ بھر میں دفعہ 144 کے نفاذ میں مزید 30 روز کی توسیع کر دی ہے جس کے تحت کھلی فضا میں ڈرون اڑانے پر پابندی برقرار رہے گی۔

محکمہ داخلہ پنجاب کے ترجمان کے مطابق یہ فیصلہ سیکیورٹی خدشات کے پیش نظر عوامی تحفظ کو یقینی بنانے، امن و امان برقرار رکھنے اور املاک کے تحفظ کے لیے کیا گیا ہے۔

پابندی کا یہ حکم نامہ 25 مئی تک نافذ العمل رہے گا۔

ترجمان کا کہنا ہے کہ ہالز اور مارکیز میں منعقدہ ان ڈور تقریبات کے دوران چھوٹے ڈرونز کے محدود استعمال کی اجازت ہوگی تاہم ان کے محفوظ آپریشن کی تمام تر ذمہ داری منتظمین پر عائد ہوگی۔

محکمہ داخلہ کی جانب سے جاری کردہ اعلامیے میں واضح کیا گیا ہے کہ انٹیلی جنس اور قانون نافذ کرنے والے اداروں کے اہلکار اس پابندی سے مستثنیٰ ہوں گے۔

حکام نے صوبہ بھر کی ضلعی انتظامیہ اور پولیس کو ہدایت کی ہے کہ کسی بھی ناخوشگوار واقعے سے بچنے کے لیے ان احکامات پر سختی سے عمل درآمد کروایا جائے۔