آپریشن غضب الحق: پاک فوج کی چمن سیکٹر میں افغان طالبان کی چوکیوں پر جوابی کارروائی

راولپنڈی سے موصولہ اطلاعات کے مطابق پاک افغان سرحد پر افغان طالبان اور فتنہ الخوارج کی جانب سے بلا اشتعال جارحیت کے جواب میں پاکستانی سیکیورٹی فورسز نے بھرپور جوابی کارروائی کا آغاز کر دیا ہے۔ چمن سیکٹر میں جاری اس آپریشن کو غضب الحق کا نام دیا گیا ہے جس کے تحت دشمن کی متعدد چوکیوں کو نشانہ بنایا گیا ہے۔

سیکیورٹی ذرائع کا کہنا ہے کہ آپریشن غضب الحق کے دوران پاکستانی افواج نے انتہائی مؤثر کارروائی کرتے ہوئے سرشان، المرجان اور ایدھی پوسٹس کو کامیابی سے ہدف بنایا ہے۔ اس کارروائی میں دشمن کی ایک گاڑی اور دیگر تنصیبات کو بھی مکمل طور پر تباہ کر دیا گیا ہے۔

پاکستانی سیکیورٹی حکام نے اپنے عزم کا اعادہ کیا ہے کہ مادرِ وطن کے دفاع کے لیے مسلح افواج ہر قسم کی قربانی دینے کے لیے تیار ہیں۔ حکام کے مطابق دہشت گردوں اور ان کے سہولت کاروں کے ناپاک عزائم کو خاک میں ملا دیا جائے گا۔

سیکیورٹی ذرائع نے واضح کیا ہے کہ آپریشن غضب الحق کا سلسلہ اس وقت تک جاری رہے گا جب تک تمام مقررہ اہداف حاصل نہیں کر لیے جاتے۔ پاک فوج سرحد پر امن و امان کی صورتحال برقرار رکھنے اور کسی بھی جارحیت کا منہ توڑ جواب دینے کے لیے پوری طرح مستعد ہے۔