گل پلازہ آتشزدگی کی تحقیقاتی رپورٹ منظرِ عام پر نہ لائی جا سکی

گل پلازہ سانحہ کی تحقیقات کے لیے قائم جوڈیشل کمیشن نے اپنی رپورٹ حکومت سندھ کو جمع کرا دی ہے، تاہم نامعلوم وجوہات کی بنا پر اس رپورٹ کو تاحال منظر عام پر نہیں لایا گیا ہے۔

سرکاری ذرائع کے مطابق رپورٹ میں گل پلازہ میں آگ بجھانے کے انتظامات کے فقدان کے ساتھ ساتھ ان عوامل کی نشاندہی بھی کی گئی ہے جنہوں نے امدادی کارروائیوں میں رکاوٹیں کھڑی کیں۔ ان میں عمارت کے ارد گرد تجاوزات، ایم اے جناح روڈ پر معمول کا ٹریفک جام اور گرین لائن منصوبے پر جاری تعمیراتی کام شامل ہیں، جس کی وجہ سے ہنگامی صورتحال میں امدادی ٹیموں کو پہنچنے میں شدید مشکلات کا سامنا کرنا پڑا۔

صدر میں واقع کے ایم سی کا قریبی فائر اسٹیشن گل پلازہ سے محض پانچ منٹ کی مسافت پر ہے، لیکن مذکورہ رکاوٹوں کے باعث پہلی فائر ٹینڈر کو بھی جائے وقوعہ تک پہنچنے میں غیر معمولی وقت لگا۔

یاد رہے کہ 17 جنوری 2026 کو پیش آنے والے اس سانحے میں درجنوں افراد جان کی بازی ہار گئے تھے۔ ابتدائی طور پر سندھ حکومت نے کمشنر کراچی کے ذریعے انکوائری کرائی تھی جسے سیاسی اور سماجی حلقوں نے مسترد کر دیا تھا۔ عوامی دباؤ کے پیش نظر 10 فروری کو سندھ ہائی کورٹ کے جج جسٹس آغا فیصل کی سربراہی میں جوڈیشل کمیشن تشکیل دیا گیا تھا۔ کمیشن نے 7 اپریل کو اپنی تفصیلی رپورٹ محکمہ قانون سندھ کو پیش کر دی تھی۔

وزیراعلیٰ سندھ سید مراد علی شاہ کی زیر صدارت 9 اپریل کو ہونے والے اجلاس میں رپورٹ کی سفارشات پر عملدرآمد کے لیے تین صوبائی وزراء سید ناصر حسین شاہ، ضیاء الحسن لنجار اور جام اکرام اللہ دھاریجو پر مشتمل کمیٹی تشکیل دی گئی۔ اس کمیٹی کو کراچی میں عمارتوں کی حفاظت کے لیے فوری اصلاحات اور صوبے بھر کی تجارتی عمارتوں کا فائر سیفٹی آڈٹ کرنے کا ٹاسک دیا گیا ہے۔

ترجمان وزیراعلیٰ ہاؤس کا کہنا ہے کہ اگر تجارتی عمارتوں میں آگ سے تحفظ کے لیے نئی قانون سازی کی ضرورت پڑی تو سندھ اسمبلی کے آئندہ اجلاس میں بل پیش کیا جائے گا۔

شہری منصوبہ بندی کے ماہر فرحان انور نے مطالبہ کیا ہے کہ رپورٹ کو ہر صورت عام کیا جائے۔ ان کا کہنا تھا کہ ایسی رپورٹس میں تاخیر نہیں ہونی چاہیے اور انہیں عوام کے سامنے لانا ضروری ہے۔

ایم کیو ایم پاکستان کے ڈپٹی پارلیمانی لیڈر طحہٰ احمد خان نے بھی رپورٹ کی فوری اشاعت پر زور دیا ہے۔ انہوں نے کہا کہ یہ محض طریقہ کار کا معاملہ نہیں بلکہ انسانی جانوں کا سوال ہے۔ لواحقین کا حق ہے کہ وہ جانیں کہ ان کے پیاروں کے ساتھ کیا ہوا اور اس سانحے کا ذمہ دار کون ہے۔ انہوں نے خدشہ ظاہر کیا کہ رپورٹ کو خفیہ رکھنے سے تاثر ملتا ہے کہ حکومت سندھ اس سانحے کو روکنے میں بری طرح ناکام رہی۔

دوسری جانب ترجمان سندھ حکومت سکھ دیو اسرداس ہیمنانی نے موقف اختیار کیا ہے کہ کابینہ کی جانب سے تشکیل کردہ وزارتی کمیٹی رپورٹ کا جائزہ لے رہی ہے۔ ان کا کہنا ہے کہ کمیٹی کی سفارشات کے بعد رپورٹ کو عوام کے سامنے لایا جائے گا، جبکہ کمیٹی کو انکوائری کے نتائج کی روشنی میں جامع حکمت عملی اور اصلاحی اقدامات تجویز کرنے کا مینڈیٹ بھی دیا گیا ہے۔