کراچی میں مئی کے دوران تین ہیٹ ویوز کا خدشہ، محکمہ موسمیات نے الرٹ جاری کر دیا

محکمہ موسمیات نے خبردار کیا ہے کہ مئی کے دوران کراچی میں دو سے تین ہیٹ ویوز کا امکان ہے اور آنے والے دنوں میں درجہ حرارت میں نمایاں اضافے کی توقع ہے۔

محکمہ موسمیات کے ڈپٹی ڈائریکٹر انجم نذیر ضیغم کے مطابق آج اور کل شہر میں معمول کے مطابق گرمی رہے گی تاہم جمعہ سے پیر کے دوران درجہ حرارت میں خاصا اضافہ متوقع ہے۔

انہوں نے بتایا کہ اتوار اور پیر کو درجہ حرارت 39 سے 40 ڈگری سینٹی گریڈ تک جا سکتا ہے جس کے بعد منگل سے صورتحال معمول پر آنا شروع ہو جائے گی۔

انجم نذیر ضیغم نے واضح کیا کہ کراچی میں موجودہ گرمی کا تعلق ایل نینو سے نہیں ہے۔

تاہم انہوں نے نشاندہی کی کہ مئی میں ایل نینو کے ممکنہ ظہور کے اثرات ملک بھر کے مون سون کے نظام پر مرتب ہو سکتے ہیں۔

انہوں نے مزید تصدیق کی کہ آنے والے دنوں میں کراچی میں بارش کا کوئی امکان نہیں ہے۔