سندھ حکومت کا یکم مئی کو یومِ مزدور کے موقع پر عام تعطیل کا اعلان

سندھ حکومت نے یکم مئی 2026 بروز جمعہ کو عالمی یوم مزدور کے موقع پر صوبے بھر میں عام تعطیل کا اعلان کر دیا ہے۔ اس حوالے سے باضابطہ نوٹیفکیشن بھی جاری کر دیا گیا ہے۔

جاری کردہ نوٹیفکیشن کے مطابق صوبے کے تمام سرکاری اور نجی ادارے اس دن بند رہیں گے۔ یہ تعطیل صوبائی انتظامیہ کے ماتحت تمام سرکاری دفاتر، ذیلی محکموں، خود مختار اداروں، کارپوریشنز اور مقامی کونسلوں پر لاگو ہوگی۔ تاہم ہنگامی نوعیت کی ضروری خدمات بدستور فعال رہیں گی۔

اسٹیٹ بینک آف پاکستان نے بھی یکم مئی کو ملک بھر میں بینکوں کی تعطیل کی تصدیق کر دی ہے جس کے تحت اس روز تمام بینکنگ آپریشنز معطل رہیں گے۔

پاکستان سمیت دنیا بھر میں یکم مئی کا دن مزدوروں کے حقوق اور ان کی خدمات کو خراج تحسین پیش کرنے کے لیے منایا جاتا ہے۔ اس دن کی تاریخی حیثیت 1886 میں شکاگو میں ہونے والی مزدور تحریک سے جڑی ہے جہاں محنت کشوں نے استحصال کے خلاف آواز بلند کی تھی۔

پاکستان میں یوم مزدور کا باضابطہ آغاز 1973 میں ذوالفقار علی بھٹو کے دور حکومت میں ہوا تھا۔ اس دن ملک بھر میں ریلیاں، سیمینارز اور تقریبات کا اہتمام کیا جاتا ہے جن کا مقصد مزدوروں کے حقوق اور ان کی فلاح و بہبود کے عزم کا اعادہ کرنا ہوتا ہے۔

اس سال یکم مئی جمعۃ المبارک کو آنے کے باعث سرکاری اور نجی شعبے کے ملازمین کو ہفتہ وار تعطیلات سمیت تین دن کی مسلسل چھٹی ملے گی۔