کیمبرج کی جانب سے اے لیول کا پرچہ مبینہ طور پر لیک ہونے کی تحقیقات کا آغاز

کیمبرج انٹرنیشنل ایجوکیشن نے جون 2026 کے امتحانی سلسلے کے دوران پیپر لیک ہونے کی اطلاعات کا نوٹس لیتے ہوئے تحقیقات شروع کر دی ہیں۔ ترجمان کیمبرج کی جانب سے جاری بیان میں کہا گیا ہے کہ ادارے کو پیپر لیک ہونے کی خبروں کا علم ہے اور ان کی مکمل جانچ پڑتال کی جا رہی ہے۔ مزید معلومات جون 2026 کے امتحانات کے اختتام پر فراہم کی جائیں گی۔

یہ پیش رفت ایڈوانسڈ سبسیڈیری میتھمیٹکس پیپر ون، کوڈ پیور میتھمیٹکس 1 (9707) کے مبینہ طور پر امتحان سے قبل لیک ہونے کے بعد سامنے آئی ہے۔ سوشل میڈیا پر گردش کرنے والی اطلاعات کے مطابق پیپر حل شدہ اور غیر حل شدہ دونوں شکلوں میں امتحان سے کئی گھنٹے قبل ہی وائرل ہو چکا تھا۔

آن لائن پلیٹ فارمز بشمول ریڈٹ اور واٹس ایپ پر پیپر کی دستیابی کے دعوے کیے گئے ہیں۔ کچھ طلباء کا یہ بھی کہنا ہے کہ پیپر کو ایک موبائل ایپلیکیشن کے ذریعے فروخت بھی کیا گیا۔ کراچی کے ایک نجی اسکول کے امتحانی مرکز میں طلباء نے شدید احتجاج کرتے ہوئے مؤقف اختیار کیا کہ پیپر پہلے سے ہی سوشل میڈیا پر موجود تھا جس سے ان کے نتائج اور تھریش ہولڈ متاثر ہونے کا خدشہ ہے۔ برٹش کونسل کے نمائندوں نے موقع پر پہنچ کر متاثرہ طلباء کے تحریری بیانات قلمبند کر لیے ہیں۔

کیمبرج کے موجودہ امتحانی نظام میں یہ واقعہ انتہائی اہمیت کا حامل ہے کیونکہ اس بار مکمل حل شدہ پیپر لیک ہونے کا دعویٰ کیا گیا ہے۔ گزشتہ برس بھی کچھ پیپرز کے سوالات سوشل میڈیا پر وائرل ہوئے تھے تاہم اس بار معاملہ زیادہ سنگین دکھائی دیتا ہے۔

وفاقی وزارت تعلیم ماضی میں بھی ایسے واقعات پر انکوائری کر چکی ہے لیکن کیمبرج کی جانب سے تحقیقاتی نتائج یا ذمہ داروں کے خلاف کی گئی کارروائی کی تفصیلات وزارت کے ساتھ کبھی شیئر نہیں کی گئیں۔ سیکیورٹی پروٹوکول کے مطابق امتحانی پرچے مرکز سے باہر نہیں جا سکتے کیونکہ طلباء براہ راست پرچے پر ہی جوابات تحریر کرتے ہیں۔

دریں اثنا سوشل میڈیا پر ایک نامعلوم شخص نے پیپر لیک کرنے کی ذمہ داری قبول کرتے ہوئے کیمبرج انتظامیہ کو دھمکی دی ہے کہ اگر ان کے طریقہ کار میں تبدیلی نہ لائی گئی تو مزید پیپرز بھی لیک کیے جائیں گے۔