پی ایس ایل 11: حیدرآباد کنگز مین نے ملتان سلطانز کو شکست دے کر ایلیمنیٹر 2 کے لیے کوالیفائی کر لیا

لاہور کے قذافی اسٹیڈیم میں کھیلے گئے پاکستان سپر لیگ کے گیارہویں ایڈیشن کے ناک آؤٹ مرحلے میں حیدرآباد کنگز مین نے ملتان سلطانز کو آٹھ وکٹوں سے شکست دے کر ایلیمنیٹر ٹو کے لیے کوالیفائی کر لیا ہے۔ اس شکست کے ساتھ ہی ملتان سلطانز کا ٹورنامنٹ میں سفر اختتام پذیر ہو گیا ہے۔

ملتان سلطانز نے پہلے بیٹنگ کرتے ہوئے مقررہ بیس اوورز میں نو وکٹوں کے نقصان پر 159 رنز بنائے۔ کپتان شان مسعود 69 رنز کے ساتھ ناقابل شکست رہے، تاہم دیگر بلے بازوں میں صاحبزادہ فرحان 15، محمد نواز 18 اور اسٹیو اسمتھ 13 رنز ہی بنا سکے۔ حیدرآباد کی جانب سے عاقب جاوید، حنین شاہ اور محمد علی نے دو دو وکٹیں حاصل کیں، جبکہ صائم ایوب اور گلین میکسویل کے حصے میں ایک ایک وکٹ آئی۔

ہدف کے تعاقب میں حیدرآباد کنگز مین کے بلے بازوں نے جارحانہ کھیل کا مظاہرہ کیا اور محض 15.2 اوورز میں دو وکٹوں کے نقصان پر مطلوبہ ہدف حاصل کر لیا۔ معاذ صداقت اور عثمان خان نے 64، 64 رنز کی شاندار اننگز کھیل کر ٹیم کی جیت میں اہم کردار ادا کیا۔ کپتان مارنس لیبوشین 11 اور صائم ایوب 15 رنز کے ساتھ ناقابل شکست رہے۔ ملتان سلطانز کی جانب سے محمد اسماعیل اور اسٹیو اسمتھ نے ایک ایک کھلاڑی کو آؤٹ کیا۔

اس کامیابی کے بعد حیدرآباد کنگز مین اب جمعہ کے روز ایلیمنیٹر ٹو میں اسلام آباد یونائیٹڈ کا سامنا کرے گی۔ اس میچ کی فاتح ٹیم اتوار کو ایچ بی ایل پی ایس ایل 11 کے فائنل میں پشاور زلمی کے مدمقابل ہوگی۔ یاد رہے کہ پشاور زلمی پہلے ہی کوالیفائر میں اسلام آباد یونائیٹڈ کو 70 رنز سے شکست دے کر فائنل میں جگہ بنا چکی ہے۔