پاسپورٹ دفاتر میں 15 روز کے اندر کیش لیس نظام کے نفاذ کا فیصلہ

اسلام آباد میں وفاقی وزیر داخلہ محسن نقوی کی زیر صدارت پاسپورٹ سسٹم کی بہتری کے حوالے سے ایک اہم اجلاس منعقد ہوا۔ اجلاس میں وزیر مملکت طلال چوہدری اور دیگر اعلیٰ حکام نے شرکت کی۔

وفاقی حکومت نے شہریوں کو سہولت فراہم کرنے کے لیے پاسپورٹ کے حصول کے عمل کو تیز اور جدید بنانے کا فیصلہ کیا ہے۔ اجلاس میں بریفنگ کے دوران بتایا گیا کہ عام پاسپورٹ کی ڈیلیوری کا دورانیہ 21 دن سے کم کر کے 14 دن کر دیا گیا ہے تاکہ عوام کو بروقت دستاویزات مل سکیں۔

وزیر داخلہ محسن نقوی نے پاسپورٹ دفاتر میں آئندہ 15 روز کے اندر مکمل طور پر کیش لیس سسٹم کے نفاذ کی ہدایت جاری کر دی ہے۔ ان کا کہنا تھا کہ اس اقدام سے ایجنٹ مافیا کا خاتمہ ہوگا اور پاسپورٹ کے اجراء کے عمل میں شفافیت کو یقینی بنایا جا سکے گا۔

اجلاس میں بزنس پاسپورٹ کے اجراء کے نظام کو حتمی شکل دینے اور پاسپورٹ کی ہوم ڈیلیوری سروس کو مزید مؤثر بنانے پر بھی تفصیلی غور کیا گیا۔

اس موقع پر وزیر داخلہ نے اصلاحات کے عمل کو تیز تر کرنے کے لیے ایک علیحدہ پاسپورٹ اتھارٹی کے قیام پر زور دیا۔ انہوں نے متعلقہ حکام کو ہدایت کی کہ اس حوالے سے پیش رفت کو جلد مکمل کیا جائے۔ اجلاس میں وفاقی سیکرٹری داخلہ، ڈائریکٹر جنرل پاسپورٹ اینڈ امیگریشن اور متعلقہ افسران بھی موجود تھے۔