ایکسپریس انٹرٹینمنٹ کا نیا ڈرامہ سیریل ‘راجہ لندن کا’ جلد نشر کیا جائے گا

ایکسپریس انٹرٹینمنٹ نے اپنے نئے ڈرامہ سیریل راجہ لندن کا کا اعلان کر دیا ہے جسے چینل کی جانب سے نشریاتی معیار میں ایک اہم اضافہ قرار دیا جا رہا ہے۔ اس نئے پروجیکٹ کے ساتھ چینل اپنی ڈرامائی پیشکشوں کو مزید وسعت دینے اور ناظرین کو منفرد مواد فراہم کرنے کے عزم کو دہرایا ہے۔

اگرچہ ڈرامے کی کہانی کو تاحال صیغہ راز میں رکھا گیا ہے تاہم اسے ایک سپر کلاسک ٹائٹل کے طور پر متعارف کرایا جا رہا ہے جس کا مقصد ناظرین کو ایک نیا اور متاثر کن تجربہ فراہم کرنا ہے۔ چینل کی جانب سے تسلسل کے ساتھ معیاری ڈراموں کی پیشکش ان کی صنعت میں مضبوط پوزیشن کی عکاس ہے۔

اس ڈرامے کی ہدایات فجر رضا دیں گے جو کراچی سے تعلق رکھنے والے ایک ایسے فلم ساز ہیں جو اپنے بصری انداز اور کہانی سنانے کی منفرد تکنیک کے لیے جانے جاتے ہیں۔ فجر رضا اس پروجیکٹ کے ذریعے رومانوی تھرلر صنف میں اپنی صلاحیتوں کا لوہا منوائیں گے جس میں جذبات اور سسپنس کو ایک نئے زاویے سے پیش کیا جائے گا۔

ڈرامے کا اسکرپٹ شاہد ڈوگر نے تحریر کیا ہے جو عبداللہ پور کا دیوداس جیسے کامیاب پروجیکٹس کے بعد ابھرتے ہوئے لکھاریوں میں شامل ہیں۔ شاہد ڈوگر نے راجہ لندن کا میں کرداروں کی گہرائی اور پیچیدہ انسانی نفسیات کو اجاگر کیا ہے جس سے کہانی میں تجسس اور ڈرامائی شدت پیدا ہوگی۔

شائقین کی جانب سے اس پروجیکٹ کے حوالے سے بے چینی بڑھتی جا رہی ہے اور جلد ہی مرکزی کاسٹ کا اعلان متوقع ہے۔ ایکسپریس انٹرٹینمنٹ کی جانب سے سٹار کاسٹ کے ناموں کو فی الحال خفیہ رکھا گیا ہے جس سے ناظرین میں تجسس کی فضا قائم ہے۔