ایئرپورٹ سیکیورٹی معاہدوں سے متعلق خبریں مبالغہ آرائی پر مبنی قرار

ایئرپورٹ سیکیورٹی کے لیے دو اعشاریہ چار ارب ڈالر کی سرمایہ کاری اور بیس ارب روپے کے ای-گیٹ منصوبے کو بغیر ٹینڈر دینے سے متعلق میڈیا رپورٹس کو باخبر ذرائع نے مبالغہ آرائی پر مبنی اور گمراہ کن قرار دیا ہے۔ ذرائع کا کہنا ہے کہ ایڈوانسڈ پیسنجر انفارمیشن سسٹم اور پیسنجر نیم ریکارڈ سمیت جدید سیکیورٹی نظام کی تنصیب کا عمل پبلک پروکیورمنٹ ریگولیٹری اتھارٹی کے وضع کردہ قواعد و ضوابط کے عین مطابق جاری ہے۔

حکام کے مطابق قومی اہمیت کے حامل کسی بھی منصوبے کا ٹھیکہ شفاف اور مسابقتی بولی کے عمل کے ذریعے ہی دیا جائے گا جس میں میرٹ کو اولین ترجیح حاصل ہوگی۔ اس عمل میں لاگت کی افادیت، تکنیکی مہارت اور قومی ڈیٹا پروٹیکشن قوانین کی پاسداری کو یقینی بنایا جائے گا۔ ذرائع نے واضح کیا ہے کہ مسافروں کا حساس ڈیٹا حکومتی تحویل میں رکھنا اولین ترجیح ہے اور اس حوالے سے ڈیٹا پر حکومت پاکستان کی مکمل ملکیت اور قانونی اختیار غیر متزلزل شرط ہے۔

دو اعشاریہ چار ارب ڈالر کی مبینہ سرمایہ کاری کے اعداد و شمار کو حقائق کے منافی قرار دیتے ہوئے ذرائع کا کہنا ہے کہ منصوبے کی اصل لاگت شفاف بولی کے عمل کے بعد ہی طے ہو سکے گی لہذا کسی ایک تجویز کو حتمی یا پسندیدہ قرار دینا غلط ہے۔ ذرائع نے ان خدشات کا اظہار کیا ہے کہ مفاد پرست عناصر کی جانب سے ایک منظم مہم کے ذریعے غلط معلومات پھیلائی جا رہی ہیں تاکہ مخصوص تجاویز کو ترجیح دی جا سکے۔

ماضی کے تجربات کی روشنی میں حکومتی ذرائع نے اس بات کا اعادہ کیا ہے کہ تمام منصوبوں کی جانچ پڑتال اور شفافیت کو ہر صورت یقینی بنایا جائے گا۔ حکام نے واضح کیا ہے کہ بین الاقوامی تعاون کا خیرمقدم کیا جاتا ہے لیکن قومی انفراسٹرکچر کے تمام فیصلے پاکستان کے ادارہ جاتی طریقہ کار اور اسٹریٹجک ترجیحات کے مطابق ہی کیے جائیں گے۔