ترکیہ کے سفیر عرفان نیزیر اوگلو نے جمعہ کے روز دفتر خارجہ میں نائب وزیراعظم اور وزیر خارجہ اسحاق ڈار سے ملاقات کی۔ ملاقات کے دوران دونوں ممالک نے باہمی تعلقات کو مزید مستحکم کرنے اور علاقائی امن کے فروغ کے عزم کا اعادہ کیا۔
ترک سفیر نے صدر رجب طیب اردوان کی جانب سے مشرق وسطیٰ میں قیام امن اور استحکام کے لیے پاکستان کی جاری کوششوں کو سراہتے ہوئے ان کی حمایت کا پیغام پہنچایا۔
نائب وزیراعظم کے دفتر سے جاری بیان کے مطابق ترک قیادت نے علاقائی چیلنجز سے نمٹنے میں اسلام آباد کے تعمیری کردار پر مکمل اعتماد کا اظہار کیا۔
اس موقع پر اسحاق ڈار نے خطے میں پائیدار امن کے قیام کے لیے پاکستان کے عزم کو دہرایا اور کہا کہ استحکام کے فروغ کے لیے سفارتی روابط کا تسلسل ناگزیر ہے۔
وزیر خارجہ نے پاکستان اور ترکیہ کے درمیان اعلیٰ سطح کے تبادلوں اور قریبی رابطوں کا خیرمقدم کرتے ہوئے مختلف شعبوں میں اسٹریٹجک شراکت داری کو مزید گہرا کرنے کے عزم کا اظہار کیا۔
ملاقات میں دونوں جانب سے دوطرفہ تعلقات میں موجود مثبت پیش رفت پر اطمینان کا اظہار کیا گیا اور مشترکہ علاقائی و عالمی چیلنجز سے نمٹنے کے لیے باہمی تعاون کو جاری رکھنے پر اتفاق کیا گیا۔
